САУДЫН АРАБ РУУ ХИЙСЭН ДАЙРАЛТАД ИРАНЫГ БУРУУТГАЖ БАЙНА

Өнгөрсөн бямба гарагт Саудын Арабийн газрын тос олборлогч "Saudi Aramco" компани руу дрон ашиглан дайралт хийсний улмаас нефтийн олборлолт ба экспортод нь ноцтой хохирол учирсан талаар "Reuters" агентлаг мэдээлсэн байна. Бямба гарагийн орой Йемений хусит босогчдын "Ансар Аллах" бүлэглэлтэсрэх бөмбөг бүхий 10 дрон ашиглан дайралт хийж. Дайралтын дараа Саудын Арабийн зүүн нутаг дахь Абкайк, Хурайс орд газруудын ойролцоох газрын тос олборлох объектууд дээр их хэмжээний түймэр дэгдсэн. Үүнээс болж Саудын Араб өдрийн олборлолтынхоо хэмжээг даруй хоёр дахин буюу 5 сая баррелиэр бууруулах шийдвэр гаргасан байна. Газрын тосны экспортоо тасалдуулахгүйн тулд нөөц сангаас газрын тос нийлүүлж эхэлжээ.

Хусит босогчдын бүлэглэл дайралт хийсэн гэж мэдэгдээд байгаа ч АНУ-ын Төрийн нарийн бичгийн дарга Майк Помпео гол буруутан нь Иран гэсэн байна. АНУ-ын Ерөнхийлөгч Трамп нь Саудын удирдлагуудтай утсаар ярихдаа улс орон бүр өөрийгөө хамгаалах эрхтэй тухай ярилцсан гэж байна. АНУ-ын нөлөө бүхий зарим улс төрч Ираны газрын тос олборлох объектуудад агаараас цохилт өгөх санал гаргасан тухай мэдээ ирж байна. Иймд ойрын өдрүүдэд Персийн булан орчмын цэрэг, улс төрийн байдал улам хурцадна гэдгийг шинжээчид анхааруулж байна. Ираны эрх баригчид энэхүү дайралттай ямар ч хамаарал холбоогүй тухайгаа албан ёсоор зарласан.

Энэхүү дайралтаас болоод дэлхийн зах зээл дээрх газрын тосны үнэ баррель нь 100 доллар хүртэл өсөж магадгүй тухай шинжээчид анхааруулжээ.