​ГЭР БҮЛИЙГ НЬ ХАРААЛААС САЛГАНА ГЭЖ 1,6 САЯ ДОЛЛАР ЗАЛИЛЖЭЭ

АНУ-ын Флорид мужийн шүүх өөрийгөө үзмэрч гэж зарлан Техас мужид амьдардаг эмэгтэйгээс 1,6 сая доллар залилан авсан этгээдэд 3 жил 4 сар хорих ял оноожээ. Мөн хэрэгтэн нь луйврын аргаар авсан бүх мөнгөө хохирогчид буцаан төлөх ёстой болсон. "Associated Press" агентлагийн мэдээлж байгаагаар 28 настай Шерри Тина Уванавич гэгч эмэгтэй 2007 онд хохирогчтой танилцахдаа өөрийгөө үзмэрч, далдыг хардаг гэж итгүүлж чадсан. Улмаар гэр бүлд нь алс холын Өмнөд Америкт амьдардаг айхтар шулам хараал хийсэн, яаралтай аврахгүй бол болохгүй гэж ятгажээ. Ингээд хараалыг зайлуулахын тулд хосгүй чадвартай талст худалдан авах, бясалгал хийх лаа авах зэрэгт мөнгө хэрэгтэй гээд 1,6 сая доллар залилан авч дөнгөсөн байжээ. Энэ явдлаас хойш нэлээд хэдэн жилийн дараа буюу 2017 онд залилагч эмэгтэй нь ямар ч хараал байгаагүй тухай хохирогчид хэлснээр өөрийгөө илчилсэн аж.