​НӨХӨН ҮРЖИХҮЙН ЭМНЭЛГИЙН БУРУУГААС ӨӨР ҮНДЭСТНИЙ ХҮҮХЭД ТЭЭСЭН ГЭР БҮЛ ШҮҮХЭД ХАНДЖЭЭ

Америкийн Нью-Жерси мужид амьдардаг гэр бүлийн хос нөхөн үржихүйн эмнэлэгт хандан хуруу шилний үр тогтоолт хийлгэсний дараа өөр хүний хүүхэд тээж төрүүлснээ мэдээд шүүхэд хандсан байна. "Metro"-ийн бичиж байгаагаар Кристина Кеддерич, Дрю Василевски нар нь хуруу шилний үр тогтоолтоор олж төрүүлсэн охин нь ази царай төрхтэй болж ирэхэд л өөр хүний хүүхэд тээснээ мэдсэн байна. Энэ хоёр хоёул европ, цагаан арьстан бөгөөд хуруу шилний үр тогтоолт хийхдээ тэдний генетикийн материалыг ашигласан гэдэгт өдий хүртэл итгэлтэй явсан байжээ. Харин эмч нар алдаа гаргасан нь илэрхий болсноор хосуудын харилцаа муудсан төдийгүй албан ёсоор гэрлэлтээ цуцлуулахад хүрсэн байна. Улмаар ДНХ-ийн шинжилгээ хийхэд Василевски нь охины биологийн эцэг биш болох нь тогтоогджээ. Гэтэл салсан хосууд үр тогтоолгохын тулд нөхөн үржихүйн эмнэлэгт 500 мянган доллар төлсөн байж. Иймд тэд эмнэлгийг шүүхэд өгч, охины биологийн эцгийн талаарх мэдээллийг ил болгохыг шаардсан. Тэдний өмгөөлөгч нь энэ талаар "Энэ хоёр охиндоо хайртай ч гэлээ өөрсдийнхөө ген бүхий хүүхэд олох эрхтэй байсан. Харин энэ бяцхан охин одоо генетикийнхээ түүхийг мэдэх эрхтэй, жинхэнэ төрөл саданд нь ямар нэг удмын өвчин байсан эсэхийг мэдэх эрхтэй" гэсэн байна. Шүүхээс салсан хосуудын хүсэлтийг ёсоор болгож, эмнэлэг нь охины биологийн эцэг хэн болох, алдаа гарах үед эмнэлэгт ажиллаж байсан бүх эмч нарын нэрийн ил болгох ёстой гэж үзжээ.