​ИЗРАЙЛЫН ЕРӨНХИЙ САЙД ИРАНЫГ ОРОСЫН ХАМГИЙН ТОМ АЮУЛ БОЛНО ГЭВ

Израйлийн Ерөнхий сайд Ираныг ирээдүйд Орост хамгийн их аюул учруулах хүч гэж тодорхойлсон байна. Нетаньяху нь Ерөнхийлөгч Путинтэй уулзахаар Орост ирээд байгаа юм.

Тэрээр РБК сонинд ярилцлага өгөхдөө Орост ирээдүйд заналхийлэх хоёр гол аюулын нэг нь Иран, нөгөөх нь лалын шашны суннаг дагагч хэт даврагчид гээд "Гэхдээ цөмийн зэвсэгтэй болохыг оролдож байгаа Ираны удирдан чиглүүлдэг лалын шашны шиаг дагагч хэт даврагчдын хүч нь хамгийн том аюул" гэжээ.

Цаашлаад тэрээр Ираныг Ойрх Дорнодыг байлдан дагуулахыг санаархаж байгаа гээд, Ираны шиаг дагагчид зэвсэгээ эцсийн бүлэгт зөвхөн Израйл гэлтгүй Өрнөд болон Оросын эсрэг эргүүлнэ гэж анхааруулсан байна. Нетаньяху нь Ирантай бий болсон хурцадмал байдлыг шийдэх талаар Путинтэй хэлэлцэхээр ирээд байгаа юм. Тэрээр Путинтэй харилцан хүндлэх байдлаар адил тэгш түвшинд уулзаж ярилцдаг гэдгээ онцолжээ.

Сүүлийн үед Израйл нь Сирийн нутагт агаараас цохилт өгөх нь эрс олшроод байгаа. Үүнийгээ Сирийн нутагт байрлаж байгаа Ираны зэвсэгт бүлэглэлүүдэд өгч байгаа цохилт гэдэг. Нетаньяху энэ талаар "Ираныг Сирид бэхлэгдэн үлдэх гэж оролдохыг нь эсэргүүцэх, бидэнд хор хүргэхийг оролдож байгаа хүмүүст хохирол учруулах гэсэн байнгын бодлогыг бид баримталдаг" гэжээ.

Иранаас дэмжлэг авдаг шиаг дагагчдын "Хезболла" бүлэглэл Сирид байгаа нь Израйлыг хамгийн ихээр түгшээж байгаа. Иймд Ираныг Сирийн нутгаас бүрэн гаргахын төлөө шаардлагатай бүхнээ хийнэ гэдгээ нэг их нууцлаад байдаггүй. Гэтэл Иран нь Сири дэх "Лалын улс" бүлэглэлийн дайтаж байгаа Оросын холбоотон. Мөн Турк, Оростой хамтраад Сирийн эрх баригчид ба сөрөг хүчин хоорондын энхийн гэрээ байгуулах хэлэлцээнд баталгаа гаргасан улс. Иймд Орос нь Ирантай харилцаагаа муутгахыг хүсэхгүй байгаа тул Нетаньяху Путин хоёрын уулзалт, хэлэлцээ нэлээд ээдрээтэй болох нь гарцаагүй.