Н.БАЯРСАЙХАН НАРЫН ХЭРЭГ ЗАДАРЧ, ХИЛИЙН ХОРИГ ТАВЬЛАА

Мэргэжлийн хяналтын байгууллагад ажиллаж байхдаа бусдыг хясан боогдуулах замаар тэрбум гаруй төгрөгийн авлига авсан Н.Баярсайхан, Э.Аззаяа нарын 25 хүнд холбогдох нийслэлийн Эрүүгийн хэргийн Давж заалдах шатны шүүх хурал өнөөдөр боллоо. Шүүх хуралд 25 шүүгдэгчийн зургаа нь оролцсон бөгөөд тэд нийт 27 өмгөөлөгчтэй байсан юм. Мөн шүүх хуралд авлига өгч, төрийн үйлчилгээ авсан иргэн, ААН-ийн төлөөлөл, прокурор Р.Батнасан, Н.Ням-Очир нар улсын яллагчаар оролцсон.

Энэ хэргийн анхан шатны шүүх хурлаар Н.Баярсайханы авлигаар олсон мөнгийг улсын орлого болгож, 40 сая төгрөгийн торгууль ногдуулсан. Харин Э.Аззаяагийн хэргийн хөөн хэлэлцэх хугацаа дууссан шалтгаанаар хэрэгсэхгүй болгосон юм. Тэгвэл прокурорын байгууллагаас шүүхийн шийдвэрт эсэргүүцэл бичсэнээр ийнхүү хэрэг үргэлжлэн шалгагдаж байна. Тодруулбал, тэднийг Эрүүгийн хуулийн 22.4.5, 22.5.1, 22.5.3 дахь зүйл заалтуудаар яллан, өнөөдөр шүүх хэлэлцлээ.

Давж заалдах шатны шүүхээс "анхан шатны шүүхийн шийдвэрийг хэрэгсэхгүй болгож" шийдвэрлэлээ. Ингэснээр авлигын хэрэг эргэн задарч, хэргийг прокурорын хяналтад мөрдөн байцааж, анхан шатны шүүхээр хянан хэлэлцэхээр болж байна.

"Цагаанбаатар, Цэндсүрэн, Наранбаатар нарын нэр бүхий зургаан этгээд хуулийн этгээдийн нэрийн өмнөөс авлигын гэмт хэрэг үйлдсэн байхад анхан шатны шүүхээс хуулийн этгээдийг татан оролцуулалгүй шийдвэрлэсэн, Н.Баярсайханд оногдуулсан ял шийтгэл хөнгөдсөн. Эрүүгийн хуульд зааснаар нийгмийн аюулын хэмжээнд ял шийтгэл нь тохирсон байх ёстой. Харин шүүгдэгч Н.Баярсайхан иргэн, ААН-ээс авлига авсан дүн нь өндөр. Үүнтэй харьцуулахад анхан шатны шүүхийн шийдвэр тохироогүй байна" зэргээр хянаж үзээд, зарим шүүгдэгч нарын авлигын хэрэгт мөрдөн шалгах ажиллагаа нэмэлтээр хийх ёстой, заим асуудлыг анхан шатны шүүхээр шийдүүлнэ гэж үзээд, анхан шатны шүүх рүү буцааж, анхан шатны шүүхийн шийдвэрийг хүчингүй болголоо.

Хоёр дахь заалтаар, Э.Аззаяа, Н.Баярсайхан нарын таслан сэргийлэх арга хэмжээг хэвээр үлдээж, нэмэлтээр хилээр гарах эрхийг хязгаарласан юм. Шүүгч тогтоолоо уншин, алх цохихтой зэрэгцэн шүүгдэгч Н.Баярсайхан шүүхийн байрнаас гарч зугтаалаа.