​19 НАСТАЙ ДЭЛХИЙН ХЭМЖЭЭНИЙ МЭРГЭЖИЛТЭН

Өдгөө 19 настай Т.Оюун-Эрдэнэ Монгол Германы МСҮТ-ийг гагнуурчин мэргэжлээр суралцан төгссөн. Тэрбээр наймдугаар сард ОХУ-д болсон "Дэлхийн мэргэжлийн ур чадварын тэмцээн"-д амжилттай оролцон, "дэлхийн хэмжээний мэргэжилтэн" болсон. Учир нь тус тэмцээний босго оноо 700 бөгөөд 700-аас дээш оноо авсан залуус дэлхийн хэмжээнд хүлээн зөвшөөрөгддөг.

63 орны 22 хүртлэх насны залуус 56 мэргэжлээр өрсөлдсөн энэ тэмцээнд манай улс найман мэргэжлээр оролцсон бөгөөд ганцхан Т.Оюун-Эрдэнэ босго оноог давж, энгэртээ медаль гялалзуулан эх орондоо ирсэн юм.

Ахлах сургуульдаа онц сайн дүнтэй суралцаж байсан Т.Оюун-Эрдэнэ есдүгээр ангиа төгсөөд шуудхан л "коллежид орж, гагнуурчин болно" хэмээн гэрийнхэнтэйгээ зөрж, амьдралын анхны алхмаа хийжээ. Учир нь түүнийг наймдугаар ангид суралцаж байхад аав нь хүүдээ гагнуур хийхийг нэг удаа зааж өгснөөр Т.Оюун-Эрдэнэ эргэлт буцалтгүй гагнуурчин мэргэжилд дурлажээ. Тиймээс л зорьж тэмүүлж, хичээн суралцан өнөөдрийн амжилтад хүрсэн байна. 19-хөн настай дэлхийн хэмжээний мэргэжилтэн Т.Оюун-Эрдэнийн хичээн суралцаж, хөдөлмөрлөж яваа амжилтаас үзэгчидтэйгэээ хуваалцаж байна.