84-Р СУРГУУЛИЙН СУРАГЧДЫН ҮДИЙН ЦАЙНЫ ТАРГИЙГ БАРИЛГЫН МАТЕРИАЛЫН САВААР ЗӨӨЖ БАЙЖЭЭ

Олон нийтийн сүлжээнд "84 дүгээр сургуулийн Үдийн цай хөтөлбөрт нийлүүлж байсан таргийг барилгын материалын саваар зөөвөрлөж байна" гэсэн мэдээлэл гарсан. Тэгвэл нийслэлийн Мэргэжлийн хяналтын газраас шалгалт хийжээ.

Шалгалтаар нийслэлийн 84 дүгээр сургуульд Үдийн цай хөтөлбөр хэрэгжүүлэгч аж ахуйн нэгж "Коко десерт" ХХК-ний үйл ажиллагааг шалгахад хүнсний зориулалтын бус саваар тараг тээвэрлэж, түгээж байгаа зөрчил илэрсэн байна. Тиймээс ашиглаж байсан сав болон таргийг лабораторийн шинжилгээнд хамруулжээ. Энэ нь Хүнсний аюулгүй байдлыг хангах тухай хуулийн 11.2 дахь заалт, Хүнсний зориулалтын бус хуванцар савны талаар авах арга хэмжээний тухай Монгол улсын Засгийн газрын 2015 оны 496 тоот тогтоолыг зөрчиж байгаа тул Зөрчлийн тухай хуулийн дагуу зөрчлийн хэрэг нээж, холбогдох арга хэмжээг авч ажиллаж байгаа аж.

Тиймээс тус компанийн гэрээ цуцлах саналыг Нийслэлийн Өмчийн харилцааны газарт, сургуулийн удирдлагад хариуцлага тооцуулах тухай саналыг Нийслэлийн Боловсролын газарт хүргүүлэхээр боллоо. Нийслэлийн Мэргэжлийн хяналтын газраас 09 сарын 03-16-ны өдрүүдэд Үдийн цай хөтөлбөр хэрэгжүүлж буй ерөнхий боловсролын сургуулиудад урьдчилан сэргийлэх хяналт шалгалтыг үргэлжлүүлж байна.