​Ц.БОРХҮҮ ТАВ ХОНОГИЙН ӨМНӨ ХӨРШТЭЙГЭЭ ЗОДООН ҮҮСГЭЖ ГЭМТЖЭЭ

УИХ-ын чуулганы нэгдсэн хуралдаанаар Үндсэн хуульд нэмэлт өөрчлөлт оруулах хоёрдугаар хэлэлцүүлгийг хийх үеэр чуулганы танхимд техникийн саатал үүссэн. Технологийн саатал үүсэх үеэр УИХ-ын Тамгын газрын Техникийн хэлтсийн дарга Ц.Борхүүгийн утас салгаатай, ямар ч сураггүй байсан нь хардлага үүсгэсэн юм. Технологийн саатал үүсэх боломжгүй үед гэнэт гацалт гарсан тул уг асуудлыг Тагнуулын байгууллага шалгаж эхэлсэн байдаг. Төрийн ордны аюулгүй байдал, бусад нууцад хамаарах асуудлыг Тагнуулын Ерөнхий Газар хариуцан ажилладаг. Тиймээс ч Тагнуулын байгууллагаас УИХ-ын Тамгын газрын Техникийн хэлтсийн дарга Ц.Борхүүг яагаад гэнэт алга болов гэдгийг нягталж үзсэн аж. Эх сурвалжийн мэдээлж буйгаар, УИХ-ын Тамгын газрын Техникийн хэлтсийн дарга Ц.Борхүү нь 8-р сарын 25-ны шөнө архидан согтуурч гэрлүүгээ орох үедээ орцныхоо цахилгаан шатанд хөрштэйгээ маргаж муудсан байна. Ц.Борхүүд халдсан хөрш залууг нь цагдаа нар эрүүлжүүлж авч явжээ.