ТӨВ АЙМГИЙН СЭРГЭЛЭН СУМЫН НУТАГТ ТАРВАГАН ТАХЛЫН БАЙГАЛИЙН ГОЛОМТ ИДЭВХЖИЖ БАЙГААГ ТОГТООЛОО

Нийслэлийн Зоонозын өвчин судлалын төв нь 2019 оны календарчилсан төлөвлөгөөний дагуу Төв аймгийн Сэргэлэн сумын нутагт 9 секторын нийт 81.0 мянган га талбайд байгалийн голомт хяналтын тандалт, хайгуул хэлбэрийн шинжилгээг хийж гүйцэтгэлээ.

Лабораторийн шинжилгээгээр Сэргэлэн сумын нутаг "Шар худаг" /3224713342/ гэдэг газраас олзворлосон үлийн цагаан оготно (Lasiopodomys brandtii)-оос дээжилсэн сорьцонд ийлдэс судлалын аргаар шинжилгээ хийхэд тарваган тахал өвчний үүсгэгч /Y.Pestis/ илэрсэн ба сорьцыг ЗӨСҮТ-ийн лавлагаа лабораториор баталгаажуулж, тухайн нутагт тарваган тахал өвчний байгалийн голомт идэвхжиж байгааг тогтоолоо.

Өмнө нь Сэргэлэн сумын нутагт 2002, 2007, 2008, 2010 онуудад хийсэн байгалийн голомт хяналтын шинжилгээгээр олзворлосон үлийн цагаан оготно, түүний бүүрэгнээс өсгөвөр, 2011 онд хийсэн шинжилгээгээр эерэг материал илрүүлж, тус сумын нутагт тарваган тахал өвчний байгалийн голомт идэвхтэй явагдаж байгааг тогтоож байсан билээ.