Ө.ЭНХТҮВШИН: Э.ОЮУНБОЛДЫН ШЭЭС СОЛИГДОХ ЯМАР Ч БОЛОМЖГҮЙ

Үндэсний их баяр наадмыг зохион байгуулах хорооны хурал болж, энэ жилийн түрүү бөх Э.Оюунболдоос авсан дээжид Дэлхийн допингийн эсрэг агентлагаас гаргасан “Хориглосон жагсаалт 2019"-д орсон S1.1A бүлгийн Станазол, S4 бүлгийн мелдониум, S5 бүлгийн гидрохлортиазид, хлориазид хэмээх дөрвөн төрлийн бодис илэрснийг Үндэсний бөхийн салбар хороо мэдэгдлээ.

Энэ талаар Шадар сайд, Үндэсний их баяр наадмыг зохион байгуулах хорооны дарга Ө.Энхтүвшингээс тодруулахад, Б сорьцын шинжилгээ өгөх хугацаа өчигдөр дууссан тул бөхийн салбар хорооноос албан ёсоор мэдээлсэн байх.

-Э.Оюунболд аварга "Миний шээсийг сольсон байна. Хууль хяналтын байгууллагад хандана" гэж мэдэгдсэн?

-БНСУ-ын лабораториос ирсэн хариуд үндэслэж шийдвэрээ гаргана. Шээс солих ямар ч боломжгүй. Эргэн тойронд камертай шинжилгээ авах өрөөнд дотуур өмд, тавчиктай нь оруулаад, өөрөө таглаад дээж өгч байгаа.

-Тэгэхээр одоо Аварга цолыг хураана гэсэн үг үү?

-Хууль журмаараа явна. Эхлээд Үндэсний бөхийн салбар хороо хуралдана. Дараа нь Баяр наадмыг зохион байгуулах үндэсний хороо хуралдана. Ингээд цол хураах асуудлыг Ерөнхийлөгчид өргөн мэдүүлнэ гэв.