МЭРГЭЖЛИЙН ХЯНАЛТЫН БАЙЦААГЧ ГАРЧ ИРСЭН Ч МАШИНДАА СУУГААД ЗУГТАВ

Төв аймгийн Аргалант сумын нутаг Цанын бааз гэх газар үйл ажиллагаа явуулдаг Эко фүүдс ХХК-ийн махны үйлдвэрийн эргэн тойронд өмхий үнэртэж, малын сэг хөглөрдөг талаар нутгийн иргэд манай редакцид хандсан юм. Манай сурвалжлах баг уг мэдээллийн мөрөөр очиход тус махны үйлдвэрийн ойролцоо үхсэн мал, малын гэдэс, толгой тэр ч бүү хэл хонины нэхийг их хэмжээгээр хаяж малын сэгэн дээр шувуу эргэлдсэн байдалтай байв.

Өмхий үнэрт аргаа барсан нутгийн иргэд мэргэжлийн хяналтын байцаагчийг дууджээ. Мэргэжлийн хяналтын байцаагч тус махны үйлдвэрийн гадна хоёр цаг хүлээсний эцэст орж шалгалтын хугацаа цаг гаруй үргэлжилсэн. Тус махны үйлдвэрийн эргэн тойронд хүн малын гоц халдварт өвчин үүсэхгүй гэсэн баталгаа байгаагүй. Махны үйлдвэрийн ойролцоо цанын бааз, цагаан хөтөл гэх хоёр ч суурин газар мөн баруун таван аймгийг холбосон төв зам бий. Харамсалтай нь шалгалт хийж бидэнд урьдчилсан байдлаар мэдээлэл өгөх байсан төв аймгийн мэргэжлийн хяналтын байцаагч үгийн зөрүүгүй машиндаа сууж зугтсан.

Нутгийн иргэдийн тавьж буй гол шаардлага нь малын сэг зэмээ цэвэрлэж, дур мэдэн ухсан газартаа нөхөн сэргээлт хийхийг шаардаж байгаа юм.

Төв аймгийн Аргалант сумын удирдлагууд, Төв аймгийн мэргэжлийн хяналтын газар дүлий дүмбэ оргиж байгаль орчин хүн малаа аюулд автуулах уу эсвэл энэ асуудалд яаралтай арга хэмжээ авах уу гэдгийг харах л үлдээд байна.