​ТАНИЛЦ: Л.ПҮРЭВБААТАРЫН АМЬДАРЧ БАЙГААД ХУРААЛГАСАН 1.4 ТЭРБУМЫН ҮНЭТЭЙ ТАНСАГ ХАУС

Өнгөрсөн зургаадугаар сарын 21-ний өдөр УБТЗ-ийн дарга асан Л.Пүрэвбаатарын амьдарч байсан тансаг хаусыг ШШГЕГ-ын ажилтнууд албадан чөлөөлсөн. Зайсанд байх уг хаус нь 370 гаруй мкв хэмжээтэй, тэрбум 400 сая төгрөгийн өртөгтэй.

Л.Пүрэвбаатар нь 2014 арванхоёрдугаар сард төмөр замын удирдах байгууллага буюу ТУЗ-ын шийдвэрээр төмөр замын даргаар томилогдсон. Томилогдсон өдрөө ажил олгогч буюу Ерөнхий хороотой контрактын гэрээ байгуулалгүйгээр тухайн үеийн Төрийн өмчийн хорооны даргын үүргийг түр орлон гүйцэтгэгч Н.Цогтбаатартай контракт гэрээг хууль бусаар байгуулж, УБТЗ-ын хөрөнгөөр өндөр үнэ бүхий хаус худалдан авсан гэх бөгөөд энэ асуудлыг УБТЗ-ын зүгээс хуулийн байгууллагаар шат дараатай шалгуулсаар ийнхүү албадан чөлөөлсөн юм. Тухайн үед манай сурвалжлах баг газар дээрээс нь сурвалжлан мэдээлэл хүргэж байсан юм.

Тухайн үед Л.Пүрэвбаатар хаусаа хүлээлгэн өгөхдөө "эНЭ бол монголын ард түмний хөрөнгө биш. Оросын хөрөнгө. Орос талын дарга нар мөнгийг нь шилжүүлж энэ хаусыг надад авч өгсөн. Энэ хаусыг би чөлөөлөөд өгсөн ч УБТЗ-ынхан зарж борлуулж ашиглах эрх байхгүй" гэсэн тайлбарыг хэлж байсан юм.УБТЗ-ын зүгээс ажилчиддаа орон сууцны урьдчилгаа олгодог. Тэгвэл энэ тансаг хаусны үнэ болох 1.4 тэрбум төгрөг нь 371 ажилтны орон сууцны урьдчилгаа болох боломжтой юм.