Д.БАТЛУТ: ЦЭРГИЙН ШТАБЫН ДАРГА АМИА АЛДАХ ҮЕД БИ ЭЭЛЖИЙН АМРАЛТТАЙ БАЙСАН

Орхон аймгийн Засаг даргын тамгын газрын Цэргийн штабын дарга Л.Болд аймгийн захиргааны байрандаа амиа алдсан талаар бид өмнө нь мэдээлсэн. Хэргийн шалтгаан нөхцлийг тогтоохоор цагдаагийн байгууллага ажиллаж байгаа юм. Бид энэ асуудлаар Орхон аймгийн засаг дарга Д.Батлутаас тодрууллаа.

Мэдээллийг эргэн сануулахад энэ сарын 05-ны өдөр Орхон аймгийн Цэргийн штабын дарга өрөөндөө нас барсан байдалтайгаар олдсон юм.

Талийгаач, Дэд хурандаа Л.Болдыг өнгөрсөн зургаадугаар сард Батлан хамгаалахын сайдын тушаалаар Орхон аймгийн ЗДТГ-ын Цэргийн штабын даргаар томилсон юм. Л.Болд нь 1985-1988 онд ЗХУ-ын /хуучнаар/ Одесс хотын Цэргийн нэгдсэн дээд сургуулийг Артиллерийн техникч инженер мэргэжлээр төгссөн. 1988-1990 он хүртэл Ардын армийн 270-р ангид салаан захирагч, ротын захирагч 1991-1994 он хүртэл Зэвсэгт хүчний 210-р ангид Албаны даргын туслах, Албаны дарга 1998-2001 он хүртэл Зэвсэгт хүчний 186-р ангид Засварын тасгийн дарга, Галт хэрэгслийн инженер 2002-2019 он хүртэл ЗДТГ-ын Цэргийн штабт Нөхөн хангалт, тоо бүртгэлийн офицерын албыг хашиж байсан хүн юм.