ШВЕД УЛСЫН ХОГ ХАЯГДАЛ ДУУСЧЭЭ

Швед Улсад хог хаягдал нь дуусч, бусад улс орноос дахин боловсруулах хог импортлоход хүсэлтэй байгаа мэдээ дэлхий нийтийг гайхшруулж байна. Шведийн айл бүрт 6-7 хогийн сав байдаг. Тухайлбал, хуванцар, цаас, шил, картон, металл болон бусад хэмээн ангилдаг. Үүнээс гадна, дахин ашиглах боломжгүй хаягдалд зориулсан хогийн сав байдаг аж. Тус улсын балчир хүүхэд хүртэл чихрийн цаасаа гудамжинд хаях нь бүү хэл хогоо буруу сав руу хаядаггүй бөгөөд уг дадлыг цэцэрлэг, сургуульд нь зааж өгдөг гэнэ. Мөн тухайн улсад буруу саванд хогоо хийвэл торгодог ажээ. Тус улс нь 1961 оноос газар доорх хийн хоолойгоор хог хаягдлын тээвэрлэлтээ хийж эхэлсэн байна. Бүх хогийн ердөө долоон хувийг хогийн цэг рүү ачдаг бөгөөд үлдсэнийг нь шатааx эсвэл дахин боловсруулалтад оруулдаг. Хог хаягдлын хомсдол нь тус улсын хувьд ноцтой асуудал болж магадгүй гэнэ. Учир нь, тэд орон сууцны халаалт, цахилгаан эрчим хүчний ихэнх хэсгээ хог боловсруулалтаар бүрдүүлдэг бөгөөд Стокгольм хотын эрчим хүчний 45 хувийг хог хаягдлаас гаргаж авдаг юм байна. Норвеги Улс нь Шведэд тусламжийн гараа сунгаж жил бүр 800 мянган тонн хог нийлүүлэхээ илэрхийлжээ. Шведүүд өөрийн улсаа хог хаягдлаас салгахаас гадна дахин боловсруулалтын явцад агаар мандалд хорт хий ялгаруулах хамгийн бага хэмжээг шийдвэрлэсэн бөгөөд шатаах зуухууддаа агаар мандалд ялгарах хорт хийн хэмжээг нэг хувиас ихгүй байлгах сүүлийн үеийн технологи ашигладаг гэнэ.