ӨНӨӨДӨР ГЭРЧҮҮДИЙГ АСУУЖ БАЙНА, ХУРАЛ МАРГААШ ҮРГЭЛЖЛЭХ ТӨЛӨВТЭЙ БАЙНА

ТЕГ-ын дарга асан Б.Хурц, Улсын ерөнхий прокурорын орлогч асан Г.Эрдэнэбат нарын есөн хүнд холбогдох хэргийн шүүх хурал гуравдахь өдрөө үргэлжилж байна. Хаалттай болж буй шүүх хурлын талаар Төв аймгийн Сум дундын эрүүгийн хэргийн анхан шатны шүүхийн Тамгын газрын Зохион байгуулах асуудал хариуцсан мэргэжилтэн Б.Жавхланбаяр мэдээлэл хийлээ . Тэрбээр, "2019 оны зургадугаар сарын 25-ны өдөр нэр бүхий есөн шүүгдэгчид холбогдох маш нууцын зэрэглэлтэй хэрэг Төв аймгийн Сум дундын Эрүүгийн хэргийн анхан шатны шүүхэд ирсэн. Наймдугаар сарын 12-нд шүүх хурал эхэлж, гурав дахь өдрөө үргэлжилж байна. Шүүх хуралдааны явцын талаар товч танилцуулбал, шүүгдэгч нар болон хохирогч нарыг асууж дууссан. Одоо гэрчүүдийг асууж байна. Маргааш үргэлжлэх төлөвтэй байна. Шүүх хуралдаанд 49 оролцогч оролцож байна. Өмнө нь ийм олон оролцогчтой шүүх хурал манай шүүх дээр болж байгаагүй. Манай гурван танхимынхаа том нь болох 54.5 ам метр талбайтай, гурван цонхтой танхимдаа шүүх хурал хийж байгаа. Нэр бүхий шүүгдэгч нарт холбогдох хэргийг Төрийн болон албаны нууцын тухай хуульд заасанчлан маш нууцын зэрэглэлтэй мэдээллийг нууцлах хугацаа 20 жил байдаг. Иймээс хэргийг хаалттай хэлэлцэж байгаа. Өчигдөр хохирогчийн өмгөөлөгчийн даралт эхэлсэн гэдэг үндэслэлээр эмчид үзүүлсэн. Хохирогч Т.Чимгээ, Ц.Амгаланбаатар нартай эмч ирсэн. Ухаан алдаж унасан зүйл байхгүй бөгөөд өнөөдөр биеийн байдал хэвийн байгаа. Үндсэн хуулийн 49 дүгээр зүйлд шүүгч хараат бус байж гагцхүү хуульд захирагдана, Ерөнхийлөгч, Ерөнхий сайд, нам, улс төрийн хүчин хэн боловч шүүгчээс таслах үүргээ хэрэгжүүлэхэд нь хөндлөнгөөс нөлөөлж болохгүй гэж заасны дагуу УИХ-ын гишүүдийг оролцох шаардлагагүй гэж шүүх үзсэн" гэсэн мэдээлэл өглөө.