​Ц.МАГАЛЖАВ: СЭРГЭЭШИЙН В СОРЬЦЫН ШИНЖИЛГЭЭ ЯВУУЛАХ ХҮСЭЛТ БӨХИЙН ХОЛБООНД ИРЭЭГҮЙ БАЙНА

МҮБХ-ны дэд тэргүүн, Монгол Улсын заан Ц.Магалжаваас допингтой холбоотой асуудлаар тодрууллаа.

-Сэргээшийн шинжилгээ өгсөн 16 бөхийн 13 нь ямар нэгэн асуудал байхгүй, допинг хэрэглээгүй гэж мэдэгдлээ. Бөхчүүдийн энэ мэдэгдэл бүгд үнэн үү?
-Үнэн. 7-р сарын 12-ны орой шөвгөрсөн бөхчүүдийн сэргээшийн шинжилгээ авсан. 14-21 хоногийн хугацаанд хариу нь допингийн эсрэг үндэсний төвд ирдэг. Харин тус төвөөс бөхчүүдийн сэргээшийн шинжилгээний хариуг Үндэсний баяр наадмыг зохион байгуулах хороонд өгдөг. Үүний зэрэгцээ шинжилгээнд хамрагдсан бөхчүүдэд бүгдтэй нь утсаар холбогдож хариуг нь өгсөн байгаа.
- Одоогийн байдлаар сэргээшийн хариугаа олон нийтэд мэдээллээгүй Э.Оюунболд, Ж.Ням-Эрдэнэ, Д.Цэрэнтогтох нар шинжилгээнийнхээ хариуг авсан юм болов уу. Энэ талаар тодорхой мэдээлэл байна уу?
-Тэрийг манай холбоо сайн мэдэхгүй. Хэрвээ допингийн хариу зөрчилтэй ирсэн бөхчүүд байвал манай холбооруу хандах учиртай. Учир нь эдгээр бөхчүүдээс допинг илэрлээ, В сорьцын шинжилгээг явуулах хэрэгтэй байна гэх хүсэлтийг Баяр наадмыг зохион байгуулах хорооноос манай салбар холбооруу албан бичгээр хандах ёстой. Одоогийн байдлаар ийм бичиг манай холбоон дээр ирээгүй байна.
-Наадмын түрүү бөхөөс допинг илрээгүй биздээ?
-Мэдэхгүй. В сорьцын шинжилгээ явуулах албан хүсэлт манай дээр одоогийн байдлаар ирээгүй байна. Анхны шинжилгээ гарсны дараа 14 хоногийн дотор явуулах ёстой байдаг.
-Допинг хэрэглэсэн бөхчүүдийн нэрсийг хэзээ албан ёсоор олон нийтэд зарлах бол. Танай холбоо энэ талаар мэдээлэлтэй байна уу?
-Үндэсний баяр наадмыг зохион байгуулах хорооны бөхийн салбар хороо маргааш ажлын өдөр олон нийтэд мэдээлэл өгөх байх.