БУЛГАН АЙМАГТ ЭХНЭР, НӨХӨР ХОЁРЫГ ЭРҮҮДЭН ШҮҮСЭН ҮҮ?

Булган аймгийн Бугат сумын иргэдийн хурлын төлөөлөгч Б нь 2018 оны арванхоёрдугаар сарын 19-20 нд шилжих шөнө бусдын гарт амиа алдсан харамсалтай хэрэг гарсан байдаг. Уг хэрэг нь өнөөдрийн байдлаар Булган аймгийн цагдаагийн газарт шалгагдаж байна.

Гэвч уг хэрэгтэй холбогдуулан гэрчээр дуудсан эхнэр, нөхөр хоёрыг Булган аймгийн Цагдаагийн газраас эрүүдэн шүүсэн гэх асуудлаар түүний өмгөөлөгч М.Ганзориг манай редакцид хандсан юм.

Тодруулбал тухайн эхнэр нөхөр хоёрын өмгөөлөгч гэх М.Ганзориг: Хүн амины хэрэгт гэрчээр дуудсан эхнэр нөхөр Д, О нарыг 2019 оны 08 дугаар сарын 02-ны өдөр "ганц худаг" гэх газарт хорино, хэргээ хүлээ, талийгаачийг чи сандлаар цохьсон, бүх гэрчүүд тэгж хэлж байна гэх мэтээр дарамталсан. Мөн эхнэр О-г 12 цаг, нөхөр Д-г 24 цаг хоолгүй ар гэрийхэнтэйгээ холбоо барих эрхийг нь хязгаарлаж хэргээ хүлээхийг тулган шаардсан тухай миний үйлчлүүлэгчид мэдээлсэн гэв.

Эрүүдэн шүүх гэмт хэрэгт дан ганц биемахбодид халдах бус үг хэлээр дарамталж, хэргийг тулгах, сүрдүүлэн зовоох хэлбэрүүд тооцогддог байна.

Хэргийг эргэн сануулахад талийгаач Б тархиндаа гэмтэл авч Дархан-Уул аймгийн эмнэлэгт хүргэгдээд нас барсан бол түүний эхнэр хүнд бэртэж толгой нь хавагнан, гарандаа 11 оёдол тавиулсан байдаг. Тухайн үед уг хэрэгтэй холбоотой АН-аас хэвлэлийн хурал зохион байгуулж байсан ч цагдаагийн байгууллагаас ахуйн хүрээнд үйлдэгдсэн гэмт хэрэг гэдгийг сануулж байсан удаатай.