"ГОВЬ" ХК-ИЙН БОХИРЫН ЛАГАНД 18 НАСТАЙ ЗАЛУУ УНАЖ, АМИА АЛДЛАА

Энэ сарын 23-ны өдөр "Говь" ХК-д ажиллаж байсан, 18 настай залуу тус компаний лаганд унаж, амь насаа алдсан харамсалтай хэрэг гарлаа. Хэргийг тодруулбал тус компанийн удирдлага өглөөний 10:30 минутын үед түүнд "Говь" ХК-ийн бохирын лаг шүүх газарт орж, бохир соруулах үүрэг өгсөн аж. Тэрбээр бохир соруулах газар орсноосоо хойш гарч ирээгүй байна. Талийгаач залуугийн хувьд "Говь" ХК-д ажилд ороод гурван сар гаруй хугацаа өнгөрч байсан бөгөөд наадмын өмнө "жинхэлсэн" байжээ.

Талийгаачийн ээж Ц-гийн мэдээлснээр, "Говь" ХК-ийн үйлдвэр дээр ирж хүүгээ сурагласан ч дотогш нэвтрүүлээгүй байна. Оройн 23.00 цагийн үед хяналтын камерын бичлэгийг шалгахад талийгаач залуу бохир шүүх газар орсноос хойш гарч ирээгүй, ажлаасаа гарч явсан нь бичигдээгүй байсан учир Онцгой байдлын байгууллагад дуудлага өгчээ. Онцгой байдлын аврагчид хэргийн газарт ирж, лаганд хуримтлагдсан бүх бохирыг соруулан авч, залуугийн цогцсыг шөнийн 02:00 цагийн үед гарган авч, Шүүхийн шинжилгээний үндэсний хүрээлэнд хүлээлгэн өгчээ. Хэргийг Хан-Уул дүүргийн цагдаагийн нэгдүгээр хэлтэст шалгаж эхэлсэн байна.