ТҮЦ-ҮҮДЭД ТАРААСАН 157 ХАВЧУУРГАТАЙ ТАЛХЫГ УСТГАЖ, ҮРГЭЛЖЛҮҮЛЭН ШАЛГАЛТ ХИЙЖ БАЙНА

Долдугаар сарын 20­нд 22 хүн хиам, өндөгтэй хавчуургатай талх ТҮЦ­ээс худалдаж авч идээд хордлогонд орсон талаар мэргэжлийн хяналтын байгууллагаас мэдээлж байсан билээ. Хордсон иргэдээс хоёр нь сэхээнд орсон боловч өчигдрийн байдлаар биеийн байдал тогтворжиж байгаа гэнэ. Эрчимт эмчилгээ хийлгэж байсан хоёр хүний нэг нь 62 настай, нөгөө нь бөөрний архаг дутагдалтай хүн байсан аж. Нийслэлийн мэргэжлийн хяналтын газрын шалгалтаар Баянзүрх дүүргийн харьяат ээж охин хоёр тус дүүргийн VI хороонд байрлах байранд дээрх төрлийн бүтээгдэхүүн бэлтгэж, ТҮЦ­үүдээр тараасан байсныг тогтоожээ. Хордлогод орсон иргэд "Тэнгис" кино театр, "Хүүхдийн урлан бүтээх төв" болон "Багшийн дээд", "Бөхийн өргөө"­ний автобусны буудлын ойролцоох ТҮЦ­үүдээс тус бүтээгдэхүүнийг авч идсэн байна. Тиймээс ТҮЦ­үүдээр тараасан нийт 157 бүтээгдэхүүнийг утсгаж, зөвшөөрөлгүй үйл ажиллагаа явуулж байсан газрын үйл ажиллагааг зогсоож, зөрчлийн хэрэг үүсгэн шалгаж байгаа аж. Зориулалтын бус байранд орц найрлага, хадгалалтын горим нь тодорхой бус, хаяг шошгогүй бүтээгдэхүүн бэлтгэж борлуулсан иргэн, аж ахуйн нэгжийг Зөрчлийн тухай хуулиар шийтгэдэг. Хуульд зааснаар 50 мянгаас 300 мянга хүртэлх төгрөгөөр торгох заалттай.