​ЁОХОР ХАТАР-2019 АРДЫН УРЛАГИЙН НААДАМ ХЭНТИЙ АЙМАГТ БОЛЛОО

Буриад зоны эртний уламжлалт бүжгийн "Ёохор хатар 2019" наадмыг түүхэн аялал жуулчлалын бүс нутаг Хэнтий аймгийн Батширээт суманд долдугаар сарын 16-19-ний өдрүүдэд зохион байгуулж, шилдгүүдээ шалгарууллаа.Тус наадмыг дөрөв дэх удаагийн зохион байгуулж байгаа бөгөөд энэ жилээс Буриадын Хатар бүжгийн төрлийг нэмэгдүүлжээ.

Тус наадамд 12 хамтлагийн 300 гаруй ардын авьяастнууд өрсөлдөж шилдгийн шилдэг "Гранпри" шагналын эзнээр Хэнтий аймгийн Батширээт сумын "Тоонот" хамтлаг шалгарч,өргөмжлөл цом, 3 сая төгрөгийн эзэн боллоо.Мөн үзэгчдийн таашаалд нийцсэн хамтлагаар Дорнод аймгийн Баян-Уул сумын "Улзын шигтгээ" хамтлаг шалгарсан бол "Ёохор Хатар-2019" наадмын "НЭРЭМЖИТ ЦОМ"-ыг Зууны манлай бүжиг дэглээч Сэвжидийн нэрэмжит бүжгийн чуулгын дасгалжуулагч багш, МУГЖ Шагдарын Одонтуяа ардын дуу бүжгийн "Хан Хэнтий Чуулга"-д гардуулан өглөө.

Энэ жилийн "ЁОХОР ХАТАР -2019" наадмын хүрээнд Эрдэм шинжилгээний бага хурал, Буриад бөхийн барилдаан, Буриад сурын харваа, Хатар жороо морьдын уралдаан, сээр цохих, Тойрон хатар хийх, Буриад зоны аялгуу тоглолт зэрэг уламжлалт уралдаан наадмыг зохион байгуулж, наадамд оролцогчдоос гадна 1000 гаруйзочид төлөөлөгчдийг татсан өргөн дэлгэр наадам боллоо.

Дашрамд сонирхуулахад Хэнтий аймагт Чингис фистеваль, Тогорууны баяр, Ёохор наадам, Галшарын хурдан адууны баяр, Талын тайга нохойн уралдаан, Талын түмэн адууны баяр зэрэг 6 эвент арга хэмжээг уламжлал болгон зохион байгуулдаг.