СЭЛЭНГЭ АЙМАГТ АЯНГА БУУСНЫ УЛМААС ОЙ ХЭЭРИЙН ТҮЙМЭР ГАРЧЭЭ

Монгол оронд хаврын улирал, заримдаа хуурайшилт ихтэй зуны улиралд ой, хээрийн түймэр их, бага хэмжээгээр байнга гардаг. Тухайлбал, улсын хэмжээнд долдугаар сарын 16-ны өдрийн байдлаар нийслэл Улаанбаатар хот, Булган, Баян-Өлгий, Дорнод, Дорноговь, Дархан-Уул, Сэлэнгэ, Сүхбаатар, Төв, Увс, Хөвсгөл, Хэнтий аймгийн 43 суманд 89 удаагийн ой, хээрийн гал түймэр гарч, нийт 300433 га талбай түймэрт шатжээ.Сүүлийн мэдээллээр Сэлэнгэ аймгийн Ерөө суманд гарсан дөрвөн түймрийн гурвыг бүрэн унтраасан бол Мандал суманд гарсан түймрийг унтраахаар холбогдох албан хаагчид ажиллаж байна. Ерөө сумын Буургачин багийн "Халуун рашаан" хэмээх газрын урд уулын энгэрт усархаг бороо орж, аянга буусны улмаас ойн түймэр гарчээ. Өнөөдрийн байдлаар түймрийг тус аймгийн Онцгой байдлын газрын Мандал сум дахь Онцгой байдлын хэлтсийн Гал түймэр унтраах, аврах 19 дүгээр ангийн 25 алба хаагч унтраахаар ажиллаж, Улаанбаатар хотоос нэмэлт хүч ирснээр бүрэн унтраасан байна.