ДӨРВӨН ХУРУУГАА ТАСДУУЛСАН ДОЛООН НАСТАЙ ОХИН ДАХИН ХАГАЛГААНД ОРОХООР БОЛЖЭЭ

51 настай эрэгтэй Ч-гэх этгээд нь согтууруулах ундаа хэтрүүлэн хэрэглэсэн үедээ долоо настай нагац дүүгийнхээ дөрвөн хурууг хэрцгийгээр тасалсан балмад хэрэг өнгөрөгч 5 сарын 14 өдөр гарсан юм. ГССҮТ-д хоёр гарынх нь дөрвөн хуруу нэг хоёрдугаар үеэрээ тайрагдсан, халуун усанд гуя нь түлэгдсэн байдалтай хүргэгдэн иржээ. Баруун гарын нэг, хоёрдугаар хурууг залгах мэс заслыг яаралтай хийсэн бөгөөд гурван хуруу нь сэргэх магадлал 80-90 хувьтай гэжээ.

Нэг хуруу нь нөхөн сэргэх боломжгүй гэмтэл үүссэн юм. Тэр цагаас хойш хоёр сар өнгөрсөн ч охин энэ хугацаанд хоёр удаа хуруу залгуулах мэс засалд оржээ. Хоёрдахь хагалгаандаа ороод удаагүй байгаа юм. Өмнө залгуулсан эрхий хуруу идээлж үрэвссэн учраас эргүүлэн авчээ.

Хагалгааны явцад охин сэтгэл зүйн хямрал болоод биеийн байдал нөлөөлсөн учраас өвчиндөө шаналсан охин өвчин намдаах эм тариа хэрэглэж өдөр хоногийг өнгөрүүлж байна. Хурууг залгах мэс засал хийлгэсэн ч яваандаа хуруунууд нь нэг нэгээрээ авагдсан гэдгийг түүний ээж хэлж байгаа юм.

Энэхүү аймшигт хэргийг хийсэн этгээдийн хэрэг одоог хүртэл прокурорын байгууллагад шалгагдаж байгаа бөгөөд хэрэг гарсан өдрөөс эхлэн уг этгээдийг цагдан хорих 461 ангид саатуулан хорьсон юм. Гэтэл охиныг эмнэлэгт хүргэгдсэн эхний сар гэмт этгээдийн ар гэрээс охины эмчилгээний зардалд 4 орчим сая төгрөгийг зарцуулсан гэгч 2 дахь сараас эхлэн огт туслалцаа үзүүлээгүй гэдгийг хэлж байгаа юм.

Я охины хуруу залгуулах 3 дахь удаагийн хагалгаа ирэх 8 дугаар сард болох төлөвлөгөөтэй байгаа юм. Хэрэв санхүүгийн боломжтой болвол цаг алдалгүй гадагшаа эмчлүүлэх бүрэн боломжтой гэдгийг эмч нарын зүгээс хэллээ.Тиймээс долоохон настай бяцхан охинд сайхан сэтгэлт Монголын ард түмэн хандив тусламжаа үзүүлэхийг уриалж байна

Хандивын данс: Хаанбанк: 5016420885 Э.Мөнхзул \охины ээж\