​АСЕМ-ААС МӨНГӨ ЗАВШСАН ГЭХ Ч.САЙХАНБИЛАГ, Э.БАТ-ҮҮЛ ТЭРГҮҮТЭЙ АЛБАН ТУШААЛТНУУДЫН ХЭРЭГ ЗАМХАРСАН УУ?

АСЕМ-ийн дээд хэмжээний уулзалтыг манай улс хамгийн анх удаа 2016 онд зохион байгуулсан байдаг. Уг уулзалтын төсвөөс хувьдаа завшсан байж болзошгүй хэмээн нэр бүхий албан тушаалтнууд буюу 17 албан тушаалтанг зарлаж байв. Хотын дарга асан Э.Бат-Үүл 33 тэрбум, Нийслэлийн Өмчийн харилцааны газрын дарга Ч.Однасан, ГХЯ-ны Төрийн нарийн бичгийн дарга Д.Ганхуяг 784 сая, Ерөнхийлөгчийн зөвлөх асан А.Ганбаатар 765 сая төгрөг завшсан гэх мэдээлэл байдаг. Мөн Ерөнхий сайд асан Ч.Сайханбилэг, Ерөнхийлөгчийн Тамгын газрын дарга асан П.Цагаан, Хөдөлмөрийн сайд асан Г.Баярсайхан, ИНЕГ-ын дарга Г.Нямдаваа, Үнэлгээний хорооны дарга А.Дагвадорж, "Дулааны II цахилгаан станц" ТӨХК-ийн гүйцэтгэх захирал М.Баянмөнх, Цах-ДХХА цехийн дарга С.Батсайхан, ХАА-н мэргэжилтэн М.Энхбат, "Дулааны IV цахилгаан станц" ТӨХК-ийн захирал Ж.Отгонбаатар, Нийслэлийн Засаг даргын Тамгын газрын дарга Ё.Гэрэлчулуун, Улаанбаатар хотын Ерөнхий менежер Б.Бадрал, НХААГ-ын дарга С.Ганбаатар, Хан-Уул дүүргийн Засаг дарга Ж.Ганхуяг нарыг энэ хэрэгтэй холбогдуулан АТГ-аас шалгаж байгаа бөгөөд өнгөрөгч 12 дугаар сард таван хавтаст хэрэг нээн шалгаж байгаа гэж мэдээллэсэн. Тэднийг Аудитын дүгнэлтэд үндэслэн 290.9 тэрбум төгрөгийг завшсан байж болзошгүй гэж үзжээ. Уг 17 албан тушаалтны нэрийг зарлаад 5 сар болсон ч ямар нэгэн шийдвэрт хүрээгүй бололтой. Өмчийн харилцааны газрын дарга Ч.Однасан, Хотын дарга асан Э.Бат-Үүл, П.Цагаан нар мөнгө завшаагүй, гүтгэлэг явагдаж байна гэж мэлзэж байсан удаатай.