ХЯТАД ТЕХНИКИЙН ХОЦРОГДЛОО АРИЛГАХЫН ТУЛД УКРАЙНЫ ҮЙЛДВЭРИЙГ ХУДАЛДАЖ АВНА

Хятадын хөрөнгө оруулалтын "Skyrizon" компани нь Украйны хөдөлгүүр үйлдвэрлэлийн "Мотор Сич" компанийг худалдан авах хүсэлтээ дахин илэрхийлсэн тухай "Global Times" мэдээлж байна.

"Skyrizon" нь Украйны компанийн хувьцааг худалдан авах хүсэлтээ тус улсын холбогдох албадуудад өргөн барьсан бөгөөд Украйны монополийн эсрэг хороо нь энэ сарын 22-нд шийдвэр гаргах аж. Хүсэлтийг ёсоор болговол "Skyrizon" нь "Мотор Сич"-ийн хувьцааны 50 хувийг эзэмшдэг болно. Үүнээс өмнө Хятадын компани хувьцааг худалдан авах тухай хүсэлт гаргахад Америкийн зүгээс дургүйцлээ илэрхийлсэн тул зөвшөөрөл олгоогүй байжээ.

Украйны "Мотор Сич" компани үйлдвэрлэсэн 13 төрлийн 1200 ширхэг нисэхийн хөдөлгүүр Хятад байдаг тухай "Global Times" мэдээлж байна. Наймаа амжилттай болж "Мотор Сич"-ийг өөрийн болгосноор Хятад нь онгоц, нисдэг тэрэг, усан онгоцны хөдөлгүүрийн хоцрогдлоо богино хугацаанд арилгах боломжтой болно. Харин Украйн нь гол худалдан авагч Орос руу бүтээгдэхүүнээ зарж чадахгүйгээс болж хаагдах дээрээ тулаад байгаа үйлдвэрээ ажилд оруулах боломжтой болох аж.

Украйн нь 2014 оны Майдан хувьсгалын дараагаар Оростой тогтоосон бүх төрлийн харилцаа холбоогоо таслах бодлого явуулсан. 2015 онд Оростой байгуулсан батлан хамгаалах салбарт хамтран ажиллах болон цэргийн техникийн хамтын ажиллагааны гэрээнүүдээ цуцалсан.

Ингэснээр Орос нь байлдааны болон иргэний нисдэг тэрэгний мотор, байлдааны усан онгоцны моторын дутагдалд орсон ч өөрсдийн хүчээр үйлдвэрлэж эхэлсэн байдаг. Улмаар 2018 онд усан онгоц ба нисдэг тэрэгний моторын хэрэгцээгээ өөрсдөө бүрэн хангадаг болсон тухайгаа албан ёсоор мэдэгдэж байв.

Хятад нь орчин үеийн тийрэлтэт хөдөлгүүрийн үйлдвэрлэлийн салбарт Орос болон Өрнөдийн орнуудаас нэлээд хэдэн жилээр хоцорч явдаг.