МҮБХ-НЫ 15 ТЭРГҮҮЛЭГЧИЙН 8 НЬ ДОПИНГИЙН АСУУДАЛТАЙ БӨХЧҮҮДИЙГ БАРИЛДУУЛАХ ШИЙДВЭР ГАРГАЖЭЭ

Монголын үндэсний бөхийн холбооны хурлаар допинг хэрэглэсэн таван бөхийн барилдах эрхийг сэргээж, сорилго барилдаанд барилдуулах шийдвэр гаргасан. Тэргүүлэгчдийн энэ шийдвэрийг холбооны бусад 1,000 гаруй бөх “Барилдах эрхийг цуцалсан хугацаа нь дуусаагүй байхад бөхчүүдийн эрхийг сэргээсэн” хэмээн өнгөрсөн амралтын өдрүүдэд эсэргүүцсэн билээ. Энэ талаар МҮБХ-ны дэд тэргүүн, улсын заан Ц.Магалжав өнөөдөр хэвлэлийн бага хурал хийлээ. Тэрбээр ярихдаа “Монголын Үндэсний бөхийн холбооны тэргүүлэгчид бөхчүүдийн олонхын эрх ашгийг хамгаалах үүднээс маргаантай асуудлыг энэ долоо хоногт дахин хэлэлцэж, шийдэхээр болсон. Харин баяр наадмыг зохицуулах хороо барилдах эрхээ цуцлуулсан таван бөхийг наадмаар барилдах эсэх дээр шийдвэрээ гаргах байх. Монголын Үндэсний бөхийн холбоо 15 тэргүүлэгчтэй. Эдгээр бөхчүүдийг барилдуулах эсэхийг нь шийдэхээр санал хураахад найман тэргүүлэгч нь зөвшөөрч, долоо нь эсэргүүцсэн. Тиймээс холбоо дүрэм журмынхаа дагуу олонхын саналаа дагаж, бөхчүүдийг цахимаар бүртгээд барилдуулахаар болсон. Харин үүнийг мэдсэн бөхчүүд сорилго барилдааны үеэр эсэргүүцлээ илэрхийлж, барилдаан цаг гаруй хугацаагаар хойшилсон гэдгийг хэллээ.