УЛСЫН ЗААН Б.ПҮРЭВСАЙХАН: Ч.САНЖААДАМБА АВАРГА БИДНИЙГ БАРИЛДУУЛСАНГҮЙ

Өнгөрсөн жилийн баяр наадмаар Монгол Улсын заан Б.Пүрэвсайхан, Гарьд Ө.Бат-Орших, Начин Э.Даш, Аймгийн Арслан Б.Номиндалай, Сумын заан С.Майнбаяр нарын бөхчүүд допинг хэрэглэсэн нь тогтоогдсон. Тиймээс тэдний барилдах эрхийг хоёр жилээр хассан билээ. Гэтэл Монголын Үндэсний бөхийн холбоо хуралдаж эдгээр таван бөхийн барилдах эрхийг сэргээжээ. Допинг хэрэглэсэн боловч Үндэсний бөхийн холбоог найрч барилдах эрхээ олж авсан таван бөх өчигдөр бөхийн өргөөнд зодоглохоор ирээд эсэргүүцэлтэй тулгарч дэвжээнд гарч чадаагүй юм. Энэ асуудалд бөхчүүд ямар байр суурь илэрхийлсэн болохыг уншигч тантай хуваалцъя.

Монгол Улсын аварга Ч.Санжаадамба: БИ ОЛОН ЖИЛ ДОПИНГТОЙ ТЭМЦЭЖ ЯВАА

Монголын үндэсний бөхийн холбооноос допинг хэрэглэсэн таван бөхийг барилдах эрхийг сэргээсэн юм байна. Уг нь бол эдгээр бөхчүүдийн барилдах эрхийг цуцалсан хугацаа нь дуусаагүй, хэсэг бөхчүүд энэ тухай ярилцлаа. МҮБХ бол бөхчүүд биднийнхээ эрх ашгийг хамгаалах ёстой. Гэтэл тав, зургаан хүний эрх ашгийн төлөө 1000 гаруй бөхийн эрхийг хөндөж ийм шийдвэр гаргасныг бид эсэргүүцэж байна. Наадам дөхөж байхад ийм хэл ам дагуулсан мэдээлэл гарлаа. Монгол бөх шударга байх ёстой, дэлхий нийтээрээ хүн төрөлхтөн допингийн эсрэг тэмцэж байна, тиймээс ийм хортой зүйлийг хэрэглэхгүй байхыг би бөхчүүдээсээ аварга цолтой хүний хувьд уриалмаар байна. Би олон жил допингтой тэмцэж яваа.

Монгол Улсын Заан Б.Пүрэвсайхан: Ч.САНЖААДАМБА АВАРГА БИДНИЙГ БАРИЛДУУЛСАНГҮЙ

Бид нар наадмын сорилго барилдаанд барилдахаар цахимаар бүртгүүлээд ирсэн. Допинг хэрэглэсэн гэх таван бөхийн барилдах эрхийг сэргээсэн шүүхийн шийдвэр гарсан. Монголын үндэсний бөхийн холбооны тэргүүлэгчид хуралдаад энэ дагуу бидний барилдах эрхийг сэргээсэн. Би наадмаар зодоглохоор бэлтгэлдээ гарчихсан, бэлтгэл сургуулилт маань сайн байгаа. Наадмын сорилго барилдаанд хүч үзэх бөхчүүдийн дунд бидний нэрс ороод оноолт гарсан байгаа, бид ном журмынхаа дагуу л бүртгүүлсэн. Гэтэл Ч.Санжаадамба аварга нарын бөхчүүд намайг барилдуулахгүй эсэргүүцээд байгаа учир барилдсангүй. Тэд шүүх, холбооныхоо шийдвэрийг биелүүлэхгүй байна.