ТОКАЕВ КАЗАХСТАНЫ ЕРӨНХИЙЛӨГЧӨӨР СОНГОГДЛОО

Өнгөрөгч ням гарагт Казахстанд болж өнгөрсөн Ерөнхийлөгчийн сонгуулийн урьдчилсан дүн гарснаар үүрэг гүйцэтгэгчийн алба хашч байсан Касым Жомарт Токаев нь Казахстан улсын түүхэн дэх хоёр дахь Ерөнхийлөгчөөр сонгогдсон байна.Казахстаны анхны Ерөнхийлөгч Нурсултан Назарбаев энэ оны гуравдугаар сарын 30-нд албан тушаалаасаа өөрийн хүсэлтээр огцорч, хуулийн дагуу парламентын дээд танхимын дарга байсан Касым Жомарт Токаев үүрэг гүйцэтгэгч болсон юм. Харин одоо сонгуулиар ийнхүү албан ёсоор Ерөнхийлөгчөөр сонгогдлоо.

Назарбаев анхнаасаа Токаевийг өөрийн залгамжлагч гэж нэрлээд байсан тул сонгуулийн үр дүн тодорхой гэдэгт дийлэнх ажиглагчид санал нийлж байсан. Гэвч сөрөг хүчний гэгдсэн цөөн хүн сонгуулийн санал хураалтын үеэр болон санал хураалтын урьдчилсан дүнг зарласны дараа гудамж талбайд эсэргүүцлийн жагсаал, цуглаан хийж интернетээр сонгуулийг хуурамч гэсэн янз бүрийн бичлэг цацах замаар дэлхийн нийтийн анхаарлыг татах гэж оролдсон. Гэвч тухай бүрт хууль хяналтын байгууллагынхан таслан зогсоож байсан тул  амжилт олсонгүй.Сонгуульд оролцсон хөндлөнгийн бүх ажиглагчид санал хураалтыг ерөнхийдөө шударга, илт тод явагдсан гэдгийг хүлээн зөвшөөрсөн юм. Казахстаны Ерөнхийлөгчийн тангараг өргөх ёслол энэ сарын 12-нд болно гэдгийг албан ёсоор мэдэгджээ.