ХОНКОНГТ САЯ ГАРУЙ ХҮН ЭСЭРГҮҮЦЛИЙН ЖАГСААЛД ОРОЛЦОЖ БАЙНА

Хонконгт гэмт хэрэгт сэжиглэгдсэн хүмүүсийг дайчлан баривчилж  их газрын Хятадад хүлээлгэн өгч байх тухай хуулийг эсэргүүцсэн хүмүүс гудамжинд гарч эсэргүүцлийн жагсаал хийсэн тухай дэлхийн томоохон агентлагууд мэдээлж байна. Жагсаал ням гаргаагаас даваа гарагт шилжих шөнө тайван замаар болж өнгөрсөн хэдий ч зарим хүн Хонконгийн Хууль тогтоох зөвлөлийн байр руу дайрахыг оролджээ. Хариуд нь цагдаа нар нулимс асгаруулагч хий, бороохой ашигласан тухай “RTHK” мэдээлж.Хонконгийн цагдаагийн газраас тараасан мэдээгээр жагсаалд 240 мянга орчим хүн оролцсон бол бусад эх сурвалжууд сая гаруй хүн оролцсон гэж байна.Хонконг нь “1 улс + 2 систем “ гэсэн тогтолцооны хүрээнд БНХАУ-ын бүрэлдэхүүнд багтсан. Энэ тогтолцооны дагуу Хонконг их газрын Хятадаас ялгаатай өөрийн гэсэн хууль журам, шүүхтэй, түүнд нь БНХАУ-ын эрх баригчдын оролцоо хамгийн бага. Иймд Хонконг нь хэрэгтэн, гэмт хэрэг хийсэн гэх сэжигтнийг их газрын Хятадад шилжүүлэн өгөх хууль зүйн тохиролцоогүй байсан. Харин шинэ хууль батлагдсанаар Хонконгод амьдардаг эсвэл Хонконгийн нутагт  хүрэлцэн ирсэн ямар ч хүнийг Хятадын эрх баригчид гэмт хэрэг үйлдсэн гэж сэжиглэн шаардвал тийш нь шилжүүлэн өгч байхаар болох юм. Хонконгт сүүлийн 30 жилд ийм олон хүн оролцсон жагсаал болж байгаагүй аж.Энэ хуулийн төслийг өнгөрсөн сараас идэвхтэй хэлэлцэж буй бөгөөд тухайн үед АНУ, Канад, Их Британи, Европын холбоо нь ийм хууль батлагдах гэж байгаад сэтгэл зовниж байгаагаа илэрхийлж байжээ.