НЭГЭН БИЕНИЙ ХОЁР ТАЛЫН АМЬДРАЛ

1990 онд Америкийн нэгэн хос эгэл биш ихэр хүүхэдтэй болжээ. Эбигейль, Бриттани гэж нэрлэгдсэн охид нь сиамын гэж нэрлэгддэг ихэр, тэр дундаа тун ховор төрлийн сиамын ихрүүд. Тэр хоёр одоо ч Миннесотадаа эсэн мэнд амьдар байна. Эбигейль ба Бриттани Хенсель нар хэдийн 28 нас хүрсэн бөгөөд тун амаргүй ч бас сонирхолтой, өвөрмөц гэж болохоор амьдралыг туулжээ.Хоёр ихэр бүсэлхийнээс доогуур нэг биетэй, хоёр цээжтэй. Байгалиас хоорондоо мөнх холбоотой байхаар төрсөн ч хоёул хоорондоо ялгаатай, өөрийн гэсэн онцлог сонирхол, зуршил, зан ааштай.Ихрүүд өөр өөрийн гэсэн уушиг, нугас, нуруу, ходоод гэдэстэй гэхдээ бүсэлхийнээс доогуур бүх юм нь “дундынх”. Өөрөөр хэлбэл тэд хоёр хөл, хоёр гартай, өөр өөрийн талд байгаа гар ба хөлийг удирддаг. Иймд хөдөлгөөн хийх болгондоо хоорондоо тохиролцох зөвшилцөх хэрэг гардаг. Гэсэн хэдий ч Эбигейль Бриттани хоёр уйгагүй хичээсээр алхаж, гүйж, сэлж сурсан төдийгүй дугуй ч унаж чаддаг болсон.Ингээд зогсохгүй тэд мотоцикл унаж, машин барьдаг. Ингэхдээ баруун талд болж байгаа бүхнийг Эбби харин зүүн талынхыг Бриттани хариуцан хийнэ. Хоорондоо тун сайн ойлголцож сурсан тул хамтдаа төгөлдөр хуур тоглож сурсан байна. Зан ааш, сонирхол хобби нь бас нэлээд ялгаатай.

Бриттани нь сургуульд байхдаа зохион бичлэгтээ сайн байсан бол Эбби нь тоондоо илүү дуртай байсан. Кофе уухад их ялгаатай үйлчилдэг. Тодруулбал, аяга кофе уусны дараа зөвхөн Бриттанийгийн зүрх нь дэлсдэг, Эбби яадаг ч үгүй аж. Эбигейль тод өнгөтэй хувцсанд дуртай бол Бриттани даруухан өнгөнд дуртай. Гэхдээ онгоцоор нисэхээр бол нэг хүний тасалбар авдаг.Хууль зүйн үүднээс ч энэ хоёр нь тусдаа хүмүүс. Тус тусдаа иргэний үнэмлэхтэй, сургууль төгссөн диплом ба жолооны үнэмлэх нь ч тусдаа.Хамгийн гол нь хоёулаа тууштай, хөдөлмөрч, бууж өгөх дургүй тул бэрхшээлтэй олон тулгардаг хэдий ч дээд боловсрол эзэмшихээр хатуу шийдсэн. Ингэхдээ онлайнаар бус харин ойролцоох коллежед өдрөөр суралцан дээд боловсрол эзэмшихээр шийдээд санасандаа хүрсэн. Одоо хоёр ихэр бага сургуульд багшилдаг. Гэхдээ багшлахдаа нэг ажилтны ажлыг хийдэг болохоор дундаа нэг цалин авдаг юм байна.Гэхдээ эмч нар ихрүүдийн ирээдүйд санаа зовнисон хэвээр. Учир нь, их биеээрээ нийлсэн ихрүүдийн дотроос энэ хоёр шиг удаан амьдарсан тохиолдол огт гарч байгаагүй юм байна.

https://youtu.be/cbIPVo4XnLI