СОЛОНГОСТ КАФЕД ӨӨРИЙН АЯГАТАЙ ОЧВОЛ ХӨНГӨЛӨЛТ ЭДЭЛНЭ

Байгаль орчныг ихээр хордуулж байгаа хуванцарын хэрэглээг багасгах зорилгоор дэлхий даяар хуванцраар хийгдсэн нэг удаагийн аяга, таваг, гялгар уут зэргээс татгалзах хөдөлгөөн өрнөөд буй. Өмнөд Солонгос ч энэ чиглэлээр дорвитой арга хэмжээ авч эхэлсний хүчинд нийслэл орчмын кафенүүдийнх нь 80 хувь нь нэг удаагийн аяганаас сайн дураар татгалзаад байгаа тухай “YTN” мэдээлсэн байна. Тодруулбал 2018 оны зургаадугаар сараас 2019 оны дөрөвдүгээр сарын хооронд нэг удаагийн аяганы хэрэглээ 72 хувиар буюу 58 тонноор буурчээ. Үүний дээр кафенуудад өөрийн аяга халбагатай ирж үйлчлүүлдэг хүмүүсийн тоо эрс нэмэгдсэн байна. Учир нь, кафед өөрийн аяга, халбагатай ирж үйлчлүүлбэл хөнгөлөлт эдэлдэг аж. Энэхүү хөнгөлөлтийн хэмжээ сүүлийн үед өссөөр нийт 2,84 тэрбумс вон буюу 2,48 сая ам.долларт хүрчээ.