ВЕНЕСУЭЛИЙН 20 ТОНН АЛТЫГ ХУРААЖЭЭ

Германы “Deutsche Bank” Венесуэл улсыг авсан зээлийнхээ буцаан төлөлтийг хийхгүй байна гэсэн үндэслэлээр зээлийн барьцаанд тавиад байсан 20 тонн алтыг нь хураан авсан тухай “Bloomberg” мэдээлжээ. Венесуэл нь 2016 онд 20 тонн алт барьцаалж “Deutsche Bank”-аас 750 сая долларын зээл авсан аж. Гэвч газрын тосны үнэ огцом унасан, Америк ба Европын орнуудын эдийн засгийн хориг, мөнгний ханшны хэт уналт, дотоод улс төрийн зөрчил зэргээс үүдэн буцаан төлөлтийг цаг тухайд нь хийхээ байсан байна. Үүний хариуд “Deutsche Bank” 2021 онд дуусах ёстой байсан зээлийн гэрээг хугацаанаас нь өмнө цуцлаад барьцааны алтыг хураан авахаар шийдсэн нь энэ аж.

Венесуэл мөнгний ханшны хэт уналтад орсноор өргөн хэрэглээний бараа, эмийн хомсдолд орж, иргэд нь олон мянгаараа улсаа орхин дүрвэн гарах болсон. НҮБ-аас гаргасан мэдээгээр одоогийн байдлаар 3,4 сая хүн Венесуэлээс дөрвөн гараад байгаа. Энэ онд болон ирэх жил тус улсын мөнгөний ханшны уналт нь 10 сая хувь байна гэсэн урьдчилсан таамгийн Олон улсын валютын сангаас гаргасан байна.