ҮХЦ-ИЙН ГИШҮҮНД НЭР ДЭВШИГЧ Г.БАЯСГАЛАН ХҮҮГЭЭ ХЯТАДЫН ШОРОНГООС ГАРГАХАД НӨЛӨӨЛСӨН ҮҮ?

Гунгаагийн Баясгалан нь хуульч мэргэжилтэй, хуульзүйн магистр зэрэгтэй. Тэрбээр Баянхонгор аймгийн прокурорын байгууллагаас ажлын гараагаа эхэлж өдгөө төрийн албанд  27 дахь жилдээ ажиллажээ.  Түүнд хашиж үзээгүй алба гэж үгүй, хүрч үзээгүй суудал  үгүй. Төрийн банкны ТУЗ-ийн гишүүд хуйвалдаад хоёр тэрбум төгрөгийг орон сууцны дэмжлэг нэрээр хумслахад Г.Баясгалан дотор нь "тууж явсан" Улмаар Төрийн банкийг ашигтай ажиллуулсан гэх нэрийдлээр  Үндсэн хуулийн цэцийн гишүүнд нэр дэвшигч Г.Баясгалан нь  хувьдаа орон сууцны дэмжлэг гэх зориулалтаар 90 сая төгрөг авсан нь шалгалтаар тогтоогдсон юм. Тэр мөнгийг одоо төлсөн эсэх нь тодорхойгүй байна.

Үндсэн хуулийн цэцийн гишүүнээр нэр дэвшиж буй Г.Баясгалан нь өөрийнхөө төрсөн хүү Б.Дэлгэрсайханыг хатуу ялын бодлоготой харийн  шоронгоос Монголд авчирч сулласан байж болзошгүй.  Г.Баясгалангийн төрсөн хүү Б.Дэлгэрсайхан нь Малайзын нэгэн сургуульд суралцдаг байв. Түүний хүү нь оюутан байхдаа буюу  2011 онд Малайзаас БНХАУ-руу явах замдаа  их хэмжээний хар тамхи зөөвөрлөж байгаад хил дээр баригджээ. Хар тамхины хэргээр цаазын ялтай урд хөршид Б.Дэлгэрсайхан нь ял эдэлж байгаад ялтан солилцох гэрээгээр монголд ирээд суллагдсан байдаг юм.

Монгол улс ялтан солилцох гэрээгээр олон иргэнээ авах сонирхолтой байдаг ч энэ нь ярвигтай байсаар ирсэн. Харин яагаад дарга нарын хүүхдүүд ногоон гэрлээр ийнхүү ялтан солилцох гэрээгээ ирээд суллагдсан бэ гэдэг нь асуудлын гол. Бид энэ асуудлаар Үндсэн хуулийн цэцийн гишүүнд нэр дэвшигч Г.Баясгалангаас өөрөөс нь тодрууллаа.