СОГТУУ ЖОЛООЧИЙН ЖОЛООДОХ ЭРХИЙГ ХАСЧ, 400 МЯНГАН ТӨГРӨГӨӨР ТОРГОЖЭЭ

Дундговь аймгийн Дэлгэрцогт сумын төвөөс хойш 20 орчим километрт тус сумын иргэн Г гэгч нь согтуугаар тээврийн хэрэгсэл жолоодож, Замын хөдөлгөөний дүрэм зөрчсөн талаар “Дундговь Мандалговь зар” фэйсбүүк хуудсанд 2019 оны тавдугаар сарын 15-ны өдөр нийтлэгдсэн.

Тус мэдээллийн дагуу тус аймгийн Прокурорын газраас 2019 оны 5 дугар сарын 17-ны өдөр аймгийн Цагдаагийн газарт “мэдээллийн хэрэгслээр нийтлэгдсэн зөрчлийн шинжтэй гомдол, мэдээллийг шалгуулах тухай” албан бичиг хүргүүлж, дээрх гомдол, мэдээллийг шалгуулсан. Хэрэгт холбогдогч Г-д зөрчлийн хэрэг нээн шалгаад согтууруулах ундаа хэрэглэсэн үедээ тээврийн хэрэгсэл жолоодсон, Замын хөдөлгөөний дүрэм зөрчиж, эсрэг урсгал руу орж урсгал сөрсөн зөрчил гаргасан үндэслэлээр Зөрчлийн тухай хуулийн 14.7 дугаар зүйлийн 3 дахь хэсгийн 3.1 дэх заалтад зааснаар тээврийн хэрэгсэл жолоодох эрхийг 1 жилийн хугацаагаар хасч, 400 мянган төгрөгөөр торгох шийтгэл оногдуулсан гэж Дундговь Аймгийн Прокурорын Газраас мэдээллээ.