ТРАМП ЭНЭТХЭГИЙГ ШИЙТГЭВ

Энэтхэгт болсон бүх нийтийн сонгуулийн дүнгээр Ерөнхий сайдаар дахин сонгогдоод байгаа Норендра Моди АНУ-тай холбоотой тун таагүй ээдрээг тайлах шаардлагатай тулгарчээ. Учир нь, Ерөнхийлөгч Трамп нь зургаадугаар сарын 5-аас эхлэн Энэтхэгийг “Generalized System of Preferences”жагсаалтаас хасах тушаал өгсөн байна. Энэхүү жагсаалтад орсон 120 гаруй орон нь АНУ руу 3500 гаруй нэр төрлийн бараа бүтээгдэхүүнийг гаалийн татваргүй оруулж ирэх давуу эрх эдэлдэг юм.Трамп өөрийн шийдвэрээ тайлбарлахдаа “Энэтхэг нь өөрийн зах зээлийг шударга бөгөөд хүлээн зөвшөөрч болох түвшинд нээнэ гэдгээ АНУ-д батлаагүй гэж үзэж байна. Үүнтэй холбоотойгоор тус улсыг зургаадугаар сарын 5-аас эхлэн давуу эрх эдэлдэг улсуудыг жагсаалтад байхыг зогсоох нь зүйтэй” гэжээ.Энэ бол Энэтхэгийн хувьд тун таагүй мэдээ. Учир нь, Энэтхэг “Generalized System of Preferences” жагсаалтын дагуу Америк руу асар их бараа оруулан арилждаг, 2017 онд гэхэд л 5,6 тэрбум ам.долларын барааг гаалийн татваргүй оруулсан байна.

АНУ нь Энэтхэгийг Оросоос агаарын довтолгооноос хамгаалах С-400 систем худалдан авах гэрээгээ цуцлах, цаашид Оросын байлдааны зэвсэг техник худалдан авахаа зогсоох баталгаа шаардахад биелүүлээгүй тул ийм арга хэмжээ авч, шийтгэж байна гэж мэргэжилтнүүд үзсэн байна.

Үүний хариуд Энэтхэг ямар арга хэмжээ авахыг таах л үлдэв. Давуу эрхээ сэргээлгэхийн тулд Оросоос С-400 худалдан авахаа зогсоох уу эсвэл ямар ч шахалт дарамтын үл харгалзан хараат бус бодлого явуулдаг улс гэдгээ харуулах уу?