СУДАНД ҮЙМЭЭН ДЭГДЭЖ ОЛОН ХҮНИЙ АМЬ ЭРСДЭВ

Судан нийслэл Хартумд цэргийн эрхэтнүүдийг эсэргүүцсэн жагсаал болж, түүнийг тараах явцад 30 хүн алагдаж 100 гаруй хүн шархадсан байна. Жагсаал зохион байгуулагчид нь энэ оны дөрөвдүгээр сард төрийн эргэлт хийж Засгийн эрхийг гартаа авсан цэргийн эрхэтнүүдээс бүрдсэн Шилжилтийн цэргийн зөвлөл гэгчийн тараан бүх эрх мэдлийг иргэний Засгийн газарт өгч, ардчилал тогтоохыг шаардсан аж.

Энгийн жагсаалыг тараах явцад Суданы армийнхан зэвсэг хэрэглэсэнд НҮБ, Европын холбоо, Африкийн холбоо зэрэг эрс шүүмжлэн хүч хэрэглэхээ нэн даруй зогсоохыг шаардаад байна. Үүний хариуд цэргийнхэн армийн төв штабын үүдэнд болсон суугаа жагсаалыг тараахдаа хүч хэрэглээгүй, харин ойролцоох газар бөөгнөрсөн эсэргүүцэгчид нь иргэдийн аюулгүй байдалд заналхийлж байсан тул тараан, цэвэрлэх арга хэмжээ авсан төдий гэсэн утгатай мэдэгдэл хийжээ.

Гэвч Хартум хотын эмч нар энэ талаар мэдэгдэл хийхдээ цэргийнхэн жасгаалыг харгислан тараасан төдийгүй, тараах үеэр шархадсан олон хүн хүргэгдэж ирсэн эмнэлэг рүү дайрч, олон хүний аминд хүрсэн гэжээ.

Б.Бадрал