ХҮҮХЭД БҮРТ САР БОЛГОН 300 ЕВРО ӨГНӨ

Хүн амын өсөлтийг дэмжихэд хүүхдийн мөнгө чухал үүрэгтэй. Ялангуяа хүн амын дундаж насжилт нь нэмэгдсэн, төрөлт багасах гэсэн таагүй асуудалтай тулгарсан улсууд төрсөн хүүхэд болгонд насанд хүртэл тодорхой хэмжээний мөнгөн тусламж үзүүлэх замаар төрөлтийг нэмэгдүүлэхэд онцгой анхаардаг.

Энэ удаад Итали улсын Гэр бүлийн хэрэг хариуцсан яамнаас өрх гэрт олгодог янз бүрийн материаллаг тусламжийг бүгдийг нь нэгтгэн “хүүхдийн мөнгө” хэлбэрээр олгохоор болж байгаа аж. Шинээр батлагдах хуулиар жирэмсний долоон сартайгаас эхлээд хүүхдийг насанд хүртэл нь төрөөс 200-аас 300-н евро сар болгон олгоно.

Энэхүү арга нь Италид сүүлийн жилүүдэд төрөлт эрс буурч байгаа асуудлыг шийдэхэд эергээр нөлөөлнө гэж тооцжээ. Итали хүн ам зүйн ачааллын ерөнхий коэффицент нь 51,7% байгаа юм байна. Энэ бол Италид ажил хийж байгаа хүн бүр ажлын чадваргүй үлдсэн хэсгээ тэжээхийн тулд өөрт хэрэгтэйгээс 1,5 дахин илүү бараа, үйлчилгээг бүтээх ёстой гэсэн үг аж. Одоогийн байдлаар Италид ажлын чадвартай хүн амын 30,7 хувьтай тэнцэх хэмжээний тэтгэврийн насныхан амьдардаг. Төрөлтийн нэмэгдүүлэх талаар яаралтай арга хэмжээ авч эхлэхгүй бол энэ үзүүлэлт цаашид ч нэмэгдсээр эдийн засагт нь тун сөргөөр нөлөөлж магадгүй болоод байгаа аж.