ХҮНИЙ АМЬ НАС ХОХИРООЖ ХЭРГИЙН ГАЗРААС ЗУГТСАН ЭТГЭЭДИЙГ СААТУУЛЛАА

Тавдугаар сарын 23-ны өдөр Хан-Уул дүүргийн нутаг дэвсгэр Туул голын эрэг орчмоос гадны нөлөөтэйгөөр нас барсан хүний цогцос олдсон тухай бид өмнө нь мэдээлсэн билээ.  Хэргийг тодруулбал, “Туул голын эрэг орчимд нас барсан хүн байна” гэх дуудлага цагдаагийн байгууллагад бүртгэгдсэн байдаг. Дуудлагын дагуу цагдаагийн шуурхай бүрэлдэхүүн хэргийн газарт ажиллаж, амь хохирогч нь 29 настай Ш.А болохыг тогтоожээ. Цагдаагийн байгууллагынхны шалгалтын явцад талийгаачийг ар дагзнаас нь хатуу зүйлээр цохиж, амь насыг нь хохироосон болох нь тогтоогдсон байна. Дээрх хэргийг үйлдсэн сэжигтэн хэргийн газраас оргон зайлсныг яаралтай эрэн сурвалжилах ажиллагааны үр дүнд саатуулсан бөгөөд хэргийг тус дүүрэг оршин суух хаягтай 18 настай О гэгч нь согтуурсан үедээ үйлдсэн болох нь нотлогдсон байна.