ИЛ ЗАДГАЙ ЛАГ АСГАХДАА МЭРГЭЖЛИЙН ХЯНАЛТЫН БАЙГУУЛЛАГАД МЭДЭГДЭЭГҮЙ БАЙНА

Манай сурвалжлах баг өчигдөр Төв цэвэрлэх байгууламжийн лагийг СХД-ийн 20-р хорооны нутаг дэвсгэрт, айл, ААН-үүдийн хашаатай залган ил задгай асгаж байгааг газар дээрээс нь сурвалжлан хүргэсэн. Лаг зөөвөрлөх энэ ажил ирэх зургаадугаар сарын 30-ныг хүртэл үргэлжлэх бөгөөд 20 тонн-ын даацтай 22 автомашин тасралтгүй ажиллаж байгааг лаг зөөвөрлөх ажлыг хариуцан гүйцэтгэж байгаа Эко тайхи ХХК-ийн ажилтан хэлсэн. Тэгвэл иргэдийн эрүүл аюулгүй орчинд амьдрах эрхэд нөлөөлж буй, СХД-ийн төдийгүй нийслэлийн иргэдийг өмхий агаараар амьсгалуулж байгаа энэ үйлдлийг Мэргэжлийн хяналтын байгууллага мэдээгүй байна. Уг нь лаг зөөвөрлөх ажил эхлэхээс өмнө энэ ажлын гүйцэтгэгч Барилга хот байгуулалтын яамнаас НМХГ-т мэдэгдэх ёстой байжээ. Харин манай сурвалжлагын мөрөөр СХД дэх Мэргэжлийн хяналтын газрын байцаагч газар дээр нь ирж танилцсан бөгөөд шалгалтын ажиллагааг эхлүүлэхээ мэдэгдсэн. Ингэхдээ эхний ээлжинд бичиг баримтын шалгалт хийж, дараагаар агаарт цацагдаж буй хор хөнөөл, өмхий үнэрийн судалгааг хийнэ гэсэн мэдээллийг өгсөн юм.