М.ЭНХБОЛДЫН ОЛГОСОН 800 МКВ ГАЗАР 15 ЖИЛИЙН ХУГАЦААНД 2174 МКВ БОЛТЛОО ТОМОРЧЭЭ

Нийслэлийн ХУД-ийн 1-р хороо, 16-р байрны урд талын ногоон байгууламжид “Номин реалтор” ХХК савраа дүрж, 16 давхар байшин барихаар газрын хөрсийг сэндийчиж эхэллээ. Харин иргэд эсэргүүцэж, хамгаалалтын булиа залуустай тэмцэлдэн, хүчин мөхөстөж, хоёр эмэгтэй гараа гэмтээн, гипсдүүлээд байна. Гэсэн ч тэдний санаа зориг гэмтсэнгүй. Өнгөрсөн баасан гарагаас оршин суугчид зохион байгуулалтад орж, ногоон байгууламж дээрээ майхан барьж, 3 цагаар ээлжлэн өдөр шөнөгүй манаанд гараад байна. Иргэдийг “байгаль орчны хамгаалагч” болтол нь хотын үе үеийн дарга нар газар олгожээ. Номин реалтор ХХК-ийн савар, техникийн шанага хүрсэн энэ газрыг анх 2004 онд Улаанбаатар хотын захирагч М.Энхболд иргэн н.Баттөмөрт эзэмшүүлжээ. Ингэхдээ 800 мкав газрыг үйлчилгээний газрын зориулалттай олгосон байна. Энэ газар цааш Цаст констракшн ХХК-д зарагдаж, тэндээсээ 2009 онд Номин холдинг-т зарагдахдаа газрын хэмжээ 1970 мкав болж томорсон байна. Харин өнөөдөр Номин реалторын барих гээд байгаа 16 давхар байшин нь 2194 мкав газарт баригдахаар зураг төсөл нь бэлэн болжээ. ХУД-ийн оршин суугчид Засаг даргатайгаа нэгдэн уг газрын зөвшөөрлийг цуцалж өгөхийг одоогийн нийслэлийн Засаг дарга С.Амарсайханаас хүсч, албан хүсэлтээ хүргүүлээд байна. Үе үеийн Засаг дарга нарын шийдвэр хэвээр үлдэх, эсвэл иргэдэд ээлтэй ганц ч гэсэн ногоон байгууламжийг хэвээр үлдээх эсэхийг С.Амарсайхан дарга шийдэх нь ээ. Хотын иргэддээ ээлтэй Засаг дарга байх, газрын наймаачдыг дэмжигч байх нь энэ шийдвэрээр тодорхой болно.