УУРХАЙД НУРАЛТ ҮҮССЭНИЙГ ДҮҮ МИНЬ ХЭЛСЭН Ч ЦАЛИНГААР НЬ БАРЬЦААЛСААР АМИЙГ НЬ АВЧИХЛАА

Тавдугаар сарын 23-ны өдөр буюу уржигдар 23.00 цагийн үед Сэлэнгэ аймгийн Баянгол сумын Нарангийн гол гэдэг газарт үйл ажиллагаа явуулдаг "Шарын гол майнинг" алтны уурхайд осол гарч, 29 настай нэг ажилтан одоо болтол олдоогүй байна. Тодруулбал, уурхайн тогтоол нууранд нуралт болж 60 тоннын том оврын автомашинтайгаа унасан байна. Осол болсноос хойш 36 цаг болж байгаа боловч том оврын автомашин нь ч харагдахгүй, осолдсон иргэнийг гаргаж авч чадаагүй байна. Ослын газарт Дархан-Уул аймгийг Онцгой байдлын газраас 10, Сэлэнгэ аймгийн Онцгой байдлын газраас 7 алба хаагч ажиллаж байна. Осолдсон иргэн 29 настай, аав, эхнэрийнхээ хамт амьдардаг байжээ. Тэрээр энэ сарын 4-ний өдөр цалингаа авсан бөгөөд цалин олгосон компани нь "Нагай"  ХХК гэх байгууллага байжээ. Гэвч уурхайн нэр нь "Шарын гол майнинг" хэмээн ар гэрийнхэнд нь уурхайн ажилчид хэлсэн байна. Тухайн газарт осолдсон иргэний ар гэрийнхэн байгаа бөгөөд эгчээс нь зарим зүйлийг тодруулсан юм.

Тэрбээр хэлэхдээ, "осол болсон өдөр 6 хово машинтай жолооч, 2 ковштой жолооч ажиллаж байсан байна. Өдөр нь яг тэр газарт шороо нурж эхэлсэн тул ээлжийн ахлагчдаа хэлсэн байна. Дүү маань "нуралт явагдаж байна. Би энд шороо асгармааргүй байна. Өөр газарт асгая" гэхэд ээлжийн ахлагч нь "наанаа асга. Заасан газарт асгахгүй бол ажлаасаа гар" гэж бусад ажилчдын дэргэд загнаса байна. Тэгээд ажлаасаа гаръя гэтэл цалинг нь өгөхгүй" гэжээ. Дүү маань 05.30-нд цалингаа аваад буух хуваарьтай байсан учир тэсч гүрийж байгаад л амиа алдчихлаа. Маш их гомдолтой байна. Ослын газарт уурхайн дарга нар ч алга. Ганц менежер нь компанийнхаа нэрийг ч хэлэхгүй байна. Миний дүүг явж очоод үх гээд түлхчихлээ, энэ уурхайн удирдлагууд" гэсэн мэдээллийг өглөө.

Уурхайн ажилчдын хэлж байгаагаар энэ уурхай нь 50 гаруй ажилчинтай бөгөөд шөнөөр ажилладаг, ингэхдээ дохиологч, гэрэлтүүлэгч, ХАБ-ын инженер байгаагүй байна.