Д.БАТСАЙХАН: ХҮҮХЭД ХАМГААЛАХ АЖЛЫГ ГБХЗХГ-ААС АСУУ

Увс аймгийн 2 суманд сурагч охид цагдаагийн алба хаагчдад хүчиндүүлсэн хэрэг гарсан. Цагдаагийн байгууллагаас хэрэгт холбогдсон алба хаагчдыг ажлаас нь чөлөөлж, шалгаж байгааг бид мэдээлсэн.                 

Харин аймгийн удирдлагууд энэ асуудалд хэрхэн арга хэмжээ авч байгаа, цаашид хүүхэд хамгааллын чиглэлээр ямар ажлууд хийх нь тодорхойгүй байна. Тухайлбал, аймгийн засаг дарга Д.Батсайхан нь “Хүүхэд хамгааллын зөвлөл”-ийн даргын албан тушаалыг хашдаг. Гэтэл аймаг, орон нутагт нь хүүхдүүд хохирсон хэрэг гарсаар байхад Засаг дарга орон нутагтаа ч байхгүй байна. Тэрбээр 3 сар тутамд эмнэлгийн хяналтад ордог учир БНСУ руу яваад өчигдөр Улаанбаатарт иржээ. Түүнээс зарим зүйлсийг тодруулсан юм.

Танай аймагт хүүхэд хохирсон хэргүүд мэдээлэгдэж байна. Аймгийн удирдлагуудын зүгээс гэмт хэргийн тоог бууруулах чиглэлд ямар ажлууд хийж байна вэ?

Танай сайт намайг эрж хайгаад байгаа сурагтай. Би БНСУ-д эмнэлгийн хяналтдаа ороод ирлээ. Гэмт хэрэг бууруулах чиглэлд бид цагдаагийн байгууллагатайгаа хамтраад ажиллаж байна.

Хүүхэд хамгааллын чиглэлд ямар ажлууд хийж байгаа вэ?

Хүүхэд хамгааллын асуудлыг Б.Нансалмаа даргатай аймгийн ГБХЗХГ-аас асуусан нь дээр. Энэ байгууллага нь босоо удирдлагатай, 30 гаруй алба хаагчтаай, сум бүхэнд ажилтантай том байгууллага.

Та өөрөө аймгийн “Хүүхэд хамгаалах зөвлөл”-ийн даргаар ажилладаг. Танай зөвлөл ямар ажил хийдгийг тодруулмаар байна?

Бид график хуваарийн дагуу ажилладаг. Хүүхэд хамгааллын асуудлыг аймгийн ГБХЗХГ-аас асуу.

ТООН МЭДЭЭЛЭЛ: Өнгөрсөн 2018 онд улсын хэмжээнд гэр бүлийн хүчирхийллийн 1070 гэмт хэрэг гарч, 997 иргэн хохирсон. Гэмт хэргийн улмаас 5 хүн нас барж,  675 хүн гэмтэж бэртжээ. Харин 2019 он гарсаар гэр бүлийн хүчирхийллийн 383 гэмт хэрэг гарч, 2 хүн амь насаа алдсан байна.

Тэгвэл Увс аймагт 2018 онд зөвхөн насанд хүрээгүй хүүхэд бэлгийн хохирогч болсон 13 хэрэг шүүхээр шийдэгдсэн, 6 хэрэг мөрдөн байцаалтын шатанд байна. Харин 3 хэргийг хэрэгсэхгүй болгон хаажээ.