ТАЛИЙГААЧИЙН ЭХНЭР ЭМНЭЛЭГТ ХЭВТЭЖ БАЙХАД НЬ ШҮҮХ ХУРАЛ ЯВАГДААД БАЙНА

Зам тээврийн хөгжлийн яамны газрын дарга нар албан өрөөндөө архидан согтуурч, нэгнийхээ аминд хүрсэн харамсалтай хэрэг өнгөрсөн оны наймдугаар сард гарсан билээ. Тодруулбал, тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнг Төрийн захиргаа удирдлагын газрын дарга Б.Махбал хөнөөсөн байдаг. Өнгөрсөн хугацаанд сэжигтэн Б.Махбалыг ШШГЕГ-ын харьяа Цагдан хорих 461 дүгээр ангид саатуулан шалгаж байгаа бөгөөд өнгөрсөн нэгдүгээр сард яллах дүгнэлт үйлдэж хэргийг шүүхэд шилжүүлсэн юм. Харин түүнээс хойш Б.Махбалд холбогдох хэргийн шүүх хурал таван удаа хойшилсон. Учир нь, хохирогчийн хууль ёсны төлөөлөгч У.Өнөрцэцэг өмгөөлөгчөөс татгалзсан учраас шүүх хуралдааныг хойшлуулаад байсан юм. Тэгвэл яг одоо Сүхбаатар дүүргийн Эрүүгийн хэргийн анхан шатны шүүхэд Б.Махбалд холбогдох хэргийн шүүх хурал болж байна. Эх сурвалжийн мэдээлснээр шүүх хуралд талийгаач Т.Гомбосүрэнгийн ар гэрийнхэн оролцоогүй байна. Талийгаачийн эхнэрийн бие муудаж, эмнэлэгт хүргэгджээ. Түүнчлэн талийгаач Т.Гомбосүрэнгийн ар гэрийнхэн шинэ өмгөөлөгч авч чадаагүй гэнэ. Гэсэн ч Б.Махбалд холбогдох хэргийн шүүх хурал хохирогчийн ар гэр, өмгөөлөгч, гэрчгүйгээр үргэлжилж байна.