БАГШ НАР ВИНОДСОН АСУУДЛЫН ХӨӨН ХЭЛЭЛЦЭХ ХУГАЦАА ДУУССАН ГЭЛЭЭ

СХД-ийн 105-р сургуулийн багш нар ажлын байрандаа буюу сурагчдынхаа дэргэд согтууруулах ундааны зүйлс тавьсан баярын ширээ зассаныг бид мэдээлж, нийгэмд шүүмжлэл өрнөсөн. Харин тухайн сургуулийн багш, төрсөн өдрийн эзэн Б.Сэлэнгэ мэдээллийг бэлтгэсэн сэтгүүлчийг шүүхт өгсөн талаар бид мэдээлсэн.

Тэгвэл “төрийн алба хаагч ажлын байран дээрээ согтууруулах ундааны зүйл хэрэглэсэн, хадгалсан” асуудлаар ёсзүйн хариуцлага тооцсон эсэхийг нийслэлийн Боловсролын газраас тодрууллаа.

“Уг асуудлаар Боловсролын яам, нийслэлийн Боловсролын газар 105-р сургуулийн захирлаас тайлбар авсан. Сургуулийн захирал хэлэхдээ “Төрсөн өдрийн баяр тэмдэглэсэн нь энэ жил биш, өнгөрсөн жил. Тиймээс хөөн хэлэлцэх хугацаа дууссан. Нөгөө талаас ширээн дээр тавьсан виног уугаагүй, зураг авахуулаад хураасан” гэсэн тайлбар өгчээ. Тиймээс Боловсролын яамнаас аман сануулга өгсөн” гэж нийслэлийн Боловсролын газраас мэдэгдлээ.

Аман сануулга гэдэг нь хариуцлагын нэг хэлбэр. Гэтэл асуудал үүсгэсэн багш Б.Сэлэнгэ өөрийгөө буруутай гэж үзэхгүй байгаа, харьяа яамнаас өгсөн сануулгыг хүлээн авахгүй байгаа нь мэдээлэл бэлтгэсэн хэвлэл мэдээллийн байгууллагыг шүүхт дуудаж байгаагаар илэрч байгаа юм.

“Төрийн алба хаагч ажлын байран дээрээ согтууруулах ундаа хэрэглэсэн, хадгалсан тохиолдолд ажлаас чөлөөлөх хүртэл хариуцлага тооцно” хэмээн Ерөнхий сайд, нийслэлийн Засаг дарга нар мэдэгдээд байхад ийнхүү “хөөн хэлэлцэх хугацаа дууссан, виног уусан нь тогтоогдоогүй” гэх тайлбаруудыг өгч, эргээд сэтгүүлчийг шүүхэд дуудаж байгаа нь багш нарын ёс зүй, ухамсрын асуудалтай холбогдон ойлгогдож байна.