О.БОРГИЛЫГ ҮРГЭЛЖЛҮҮЛЭН ХОРИХООР БОЛЛОО

Дөрөвдүгээр сарын 9-10-нд шилжих шөнө Баянзүрх дүүрэгт байрлах "Мандала" хотхоны орон сууцны 13 давхраас Ц гэх эмэгтэй унаж нас барсан харамсалтай хэрэг гарсан. Харин энэ сарын 8-ны өдөр талийгаачийн хамтран амьдрагч О.Боргилыг цагдаагийн байгууллагаас  ШШГЕГ-ын харъяа цагдан хорих 461 дүгээр ангид саатуулсан. Түүнийг үргэлжүүлэн хорих эсэх, суллахыг шийдэх хурал дөнгөж сая болж, үргэлжүүлэн хорих шийдвэр гаргажээ.

Хэргийг эргэн сануулбал, Талийгаачийн аав Д.Сүхжаргал "Тухайн өдөр миний охиныг найзтайгаа хамт байхад нь О.Боргил залгаад хурдан ир гэж элдвээр загнасан гэж найзаас нь сонссон. Бас тэр хоёр тухайн өдөр хоорондоо маргалдсныг хөршүүд нь сонссон гэсэн. Би охиноо 13 давхраас өөрөө үсэрсэн гэж бодохгүй байна. Тийм хүмүүжил миний охинд байхгүй" гэсэн байдаг. Улмаар охиныг нь бусадтай хардаж, ширүүн авирлан, улмаар 13 давхрын цонхоор түлхэж, амь насыг нь хохироосон хэмээн үзэж байгаагаа мэдэгдсэн билээ. 

Мөн талийгаачийн төрсөн эгч С.Тунгалагмөрөн "О.Боргилыг БЗД-ийн цагдаагаас баривчилж саатуулсан. Миний дүүг хөнөөсөн нь тодорхой болчихсон болоод хорьсон гэж ойлгож байгаа" хэмээн байр сууриа илэрхийлсэн байна.