Ш.АЛТАНТУЯАГИЙН ШҮҮХ ХУРАЛ БОЛЖ БАЙНА

Монгол бүсгүй Ш.Алтантуяагийн амь насыг хөнөөсөн хэрэгтнүүдийн шүүх өнөөдөр болж байна.Малайзын Куала Лумпурт болно. Тус шүүх хуралд түүний аав С.Шаарийбуу, Ерөнхийлөгчийн Хүний эрхийн зөвлөх Г.Уянга нар оролцоно.

Уг хэргийг дахин шалгах хүсэлтийг түүний аав С.Шаарийбуу нь тавьснаар өнгөрсөн оноос эхлэн тус улсад энэхүү хэргийг шалгах болсон юм. Шүүх хурал өнгөрсөн нэгдүгээр сард эхэлж, Хүний эрхийн үндэсний комиссын гишүүн П.Оюунчимэг, С.Шаарийбуу болон талийгаач Ш.Алтантуяагийн хүү оролцсон юм. Шүүх хуралд албан ёсны орчуулагчаар Малайзад амьдардаг эмэгтэйг оролцуулсан. Манай талаас Малайзад үйл ажиллагаа явуулдаг  “Карпал Сингх” гэдэг хуулийн фирмтэй гэрээтэй ажилладаг. Энэ хуулийн фирм эрүүгийн болон иргэний шүүх хуралд хохирогчийг төлөөлж оролцох итгэмжлэлтэй юм.  Энэхүү шүүх хуралд оролсны дараа Хүний эрхийн үндэсний комиссын гишүүн П.Оюунчимэг хэвлэлд өгсөн ярилцлагадаа “Малайз манайхаас өөр системтэй. Манайх Ром германы эх газрын эрхзүйгээр явдаг. Харин Малайз бол Англи саксоны эрхзүйг мөрдөхөөс гадна Мусульман шашинтай хууль учраас шарриатын хууль үйлчилдэг. Давхардсан хуулийнхаа  зохицуулалтаар эрүүгийн хэрэг эцэслэн шийдвэрлэгдээд хааны сан хөмрөгт орсон тохиолдолд дахин сөхөж хэлэлцэх эрх, ойлголт байдаггүй. Харин сүүлийн сонгуультай холбоотойгоор бараг Малайзын түүхэнд анх удаа Хааны сан хөмрөгөөс гарсан учраас мөрдөн байцаах ажиллагаа шинээр эхэлсэн. Тиймээс бидний зүгээс шүүхийн процесс нь дүрэм журмынхаа дагуу явах юм байна гэсэн горьдлого төрж байгаа. Манайх бичмэл хуультай. Малайзынх жишиг буюу адил төстэй  хэрэг дээр үндэслэдэг. Тэгэхээр Малайзад болж буй энэ удаагийн шүүх хурал сар, хэдэн сар, жил ч үргэлжилж мэднэ. Систем нь ийм учраас шүүхийн процесс удаан үргэлжлэх магадлалтай. Эхний байдлаар 11 хоног гэж байгаа ч сар ч үргэлжлэхийг үгүйсгэхгүй” гэсэн байдаг.

Нэмж мэдээлэхэд, Ш.Алтантуяагийн амийг хөнөөсөн хэргээр  2015 онд Малайзын хоёр иргэнд цаазын ял оноосон.  Гэвч нэг нь шүүхийн шийдвэрийг гүйцэтгэхээс өмнө Австрали улс руу зугтаж, Сиднейн цагаачдыг хорих төвд хоригдож байсан. Гэхдээ жинхэнэ захиалагчид ял шийтгэлээ хүлээх ёстой гэж үзсэнээр хэргийг дахин сэргээн шалгах болсон юм.