УИХ-ЫН ГИШҮҮН Х.НЯМБААТАР, А.УНДРАА НАРЫГ БАЙНГЫН ХОРООНЫ ДАРГААР ТОМИЛОХ УУ

Энэ долоо хоногийн чуулганы нэгдсэн хуралдаанаар зарим байнгын хорооны даргыг өөрчлөх асуудлыг хэлэлцэхээр товлосон байна. Хуулийн дагуу байнгын хороог нэг жилийн хугацаанд даргалдаг бөгөөд одоогийн дарга нарын ажиллах хугацаа дуусаад таван сар өнгөрчээ.

Тодруулбал, Байнгын хороодын дарга нарын ажиллах бүрэн эрхийн хугацаа өнгөрсөн оны арванхоёрдугаар сард дууссан ч намрын чуулганы үеэр гишүүд бойкот зарласнаас болж чуулган хуралдаж чадаагүй учир ийнхүү хойшилсон байна.

Нийгмийн бодлого, боловсрол, соёл, шинжлэх ухааны байнгын хорооны даргаар ажиллаж байсан Ё.Баатарбилэг БСШУС-ын сайдаар томилогдсон учраас түүнийг байнгын хорооны даргаас чөлөөлж оронд нь УИХ-ын гишүүн Д.Оюунхоролыг томилсон.

Харин одоо Аюулгүй байдал гадаад бодлогын байнгын хорооны дарга О.Содбилэг, Байгаль орчин, хүнс хөдөө аж ахуйн байнгын хорооны дарга Л.Элдэв-Очир, Хууль зүйн байнгын хорооны дарга Ш.Раднаасэд, Төрийн байгуулалтын байнгын хорооны дарга Д.Лүнджээжанцан, Төсвийн байнгын хорооны дарга Б.Чойжилсүрэн, Эдийн засгийн байнгын хорооны дарга Д.Дамба-Очир нарыг чөлөөлж, дараагийн дарга нарыг томилно гэх мэдээлэл байгаа юм.

Эх сурвалжийн мэдээлснээр Хууль зүйн байнгын хороон даргаар УИХ-ын гишүүн Х.Нямбаатар, Өргөдлийн байнгын хороон даргаар УИХ-ын гишүүн А.Ундрааг томилохоор яригдаж байгаа аж. Мөн Төрийн байгуулалтын байнгын хорооны даргаар Д.Лүндээжанцанг сайн ажилласан хэмээн дүгнэж буй учир улираан томилж магадгүй гэх мэдээлэл байна.

Ганц Д.Лүндээжанцан гэлтгүй сайн ажилласан гэж хороодын гишүүд үзвэл байнгын хороодын одоо байгаа дарга нар үргэлжлүүлэн нэг жил ажиллах боломжтой болох юм.

 эх сурвалж: medee.mn