ХОТЫН ДАРГА БУСАДТАЙ ҮЗЭЛЦЭХ ТУХАЙ БИЧСЭНЭЭС АЖИЛ ХИЙХ ТАЛААР ДУРДСАНГҮЙ

Хотын дарга С.Амарсайхантай холбоотой таагүй мэдээллүүд тасрахгүй байна. Төрсөн ахынх нь компани туулын бургасыг хайр найргүй хядсан, шөнийн гудамжийг хааж өөрийн эзэмшлийн "Зайсан хилл" цогцолбортоо 1000 хүний суудалтай задгай талбайг нээсэн гэгчлэн мэдээллүүд хөвөрсний дараагаар Тяньжинд 50 га газар өгөх гэж байгаа талаар НИТХ-ын төлөөлөгч С.Мөнхчулуун мэдээлэв.

Энэ бүхэнд хотын дарга нэлээд ундууцаж байгаа бөгөөд мэдээлэл тараагчидтай "үзэлцэхээ" илэрхийлэв. Харин хотын дарга болсноор ямар ажлуудыг хийх гэж байгаа талаар ганц өгүүлбэр уг мэдэгдэлд нь багтсангүй. Тэрбээр өөрийн цахим хуудаснаа ийнхүү бичжээ.

"Хѳх Монголын гал голомтыг хорт утааны голомт болгож, Ард түмний амьдралыг ангалд шидсэн Авлигачид болон тэдний гар хѳл бологсдод зориулж хэдэн үг хэлье!

Та бүхний Авлига, Ах дүү, Амраг садангийн ААА зэрэглэлийн архив чинь задарч, луйвар булхай нь илэрч, үүрээ эвдүүлсэн шоргоолж шиг үймэлдэн сандарч байгааг ойлгож байна.

Харамсалтай нь С.Амарсайхан би та бүхний дохио зангаагаар хуйвалдан хѳдѳлж, хүслийг тань биелүүлдэг Утсан Хүүхэлдэй чинь биш.

Татвар тѳлѳгчдийн мѳнгѳ, хот хѳгжих боломж хоёроос 20 гаруй жил хумсалж, хулгайлж, хамж хурааснаа хаа сайгүй, хайр найргүй цацаж, гүтгэн доромжлох бүхий л ажлаас чинь эмээхгүй ээ.

Үтэр түргэн, ямар ч аргаар, ямар ч үнээр хамаагүй С.Амарсайханыг намнах нь та бүхний амин чухал зорилго.

Гэхдээ хэн юу гэх бол гэж айж, эмээж, амаа үдүүлж, амиа бодон дарга сэтэртэй байх гэж доншуур наймаачидтай дѳрѳѳ харшуулахгүй ээ!

ХОТЫГ САМУУРУУЛСАН БУСАРМАГ ҮЙЛДЭЛ, БУЛАЙ СЭТГЭЛГЭЭТЭЙ ЧИНЬ БИ ЗОГСОЛТГҮЙ ТЭМЦЭНЭ!

Эх орны эрх ашиг, их хотынхоо хѳгжлийн тѳлѳѳ ѳѳрѳѳс шалтгаалах бүхий л шийдвэрийг хуулийн хүрээнд гаргаж, хэрэгжүүлэх болно.

Хүндэтгэсэн,
Нийслэлийн Засаг дарга бѳгѳѳд Улаанбаатар хотын Захирагч С. Амарсайхан" гэжээ.