​Б.ЭНХСҮХ: С.ЗОРИГ АГСНЫ ХЭРГИЙН ЗАХИАЛАГЧ ДУНД УЛС ТӨРЧ ШАЛГАГДАЖ БАЙГАА НЬ ҮНЭН

АТГ-аас Т.Чимгээ, Б.Содномдаржаа нарыг эрүүдэн шүүсэн хэрэгт тагнуул, цагдаагийнханг холбогдуулан шалгаж байна. Төр нийгмийн зүтгэлтэн Санжаасүрэнгийн Зоригийн амь насыг бүрэлгэсэн хэргийг тойрсон асуудлаар Тагнуулын ерөнхий газрын дэд дарга Б.Энхсүхээс зарим зүйлийг тодрууллаа.

С.ЗОРИГ АГСНЫ ХЭРГИЙГ ЭРҮҮДЭН ШҮҮСЭН ГЭХ ХЭРГИЙГ ЦАГДААГИЙН БАЙГУУЛЛАГАД ШИЛЖҮҮЛЛЭЭ

- С.Зоригийн хэргийг эрүүдэн шүүж илрүүлсэн. Өөрөөр хэлбэл Б.Содномдаржаа, Т.Чимгээ нарыг эрүүдэн шүүсэн гэх хэргийг яагаад АТГ шалгах болов?

- Эрүүдэн шүүсэн гэх хэрэгт цагдаагийн гурван мөрдөгч, тагнуулын хоёр гүйцэтгэх ажилтан холбогдож шалгагдаж байгаа учир АТГ шалгах болсон. Гэхдээ хоёр хоногийн өмнө АТГ-аас энэ хэргийг цагдаагийн байгууллагаруу шилжүүлсэн. Учир нь АТГ-т уг хэргийг шалгах боловсон хүчин дутмаг.

- С.Зориг агсныг хөнөөсөн хэргээр ял эдэлж буй Ц.Амгаланбаатар намайг эрүүдэн шүүж ийм мэдүүлэг өгүүлсэн гэсэн гомдлыг гаргасан уу?

- Тийм гомдол гаргасан нь үнэн. Одоо шалгагдаж байгаа.

- Ц.Амгаланбаатар С.Зориг агсны аллагийг захиалсан хүн бол Э.Бат-Үүл гэсэн мэдүүлэг өгсөн гэх мэдээлэл бий. Э.Бат-Үүлийг энэ хэрэгт холбогдуулан шалгаж байгаа юм уу?

- Хэрэг мөрдөн байцаалтын шатанд байгаа учир тодорхой мэдээлэл өгмөөргүй байна.

ЭРҮҮДЭН ШҮҮСЭН БИЧЛЭГИЙГ ТАГНУУЛЫН АЖИЛТАН УСТГААГҮЙ АВЧ ҮЛДСЭН

- Т.Чимгээ, Б.Содномдаржаа нарыг зодож, залхааж буй зургаан хоногийн бичлэгийг бид үзсэн. Энэ устгасан байсан бичлэг юм уу? Бидэнд үзүүлсэн хэсгээс өөр хичнээн өдрийн бичлэг байгаа вэ?

- Ажлын хэсгийнхэн төв аймгийн хорих ангид камер байрлуулж бичлэг хийж байсан. Харин тэд бичлэгийг тухайн бүрт нь устгаад явсан байдаг. Харин тэнд ажиллаж байсан манай тагнуулын ажилтан бичлэгийг устгаж болохгүй учир хуулийн хүрээнд сервэр дээр хадгалаад үлдсэн. .

-Сэтгүүлчдэд бичлэгийг үзүүлсний дараагаар УИХ-ын зарим гишүүн, бас сэтгүүлчдийн зүгээс "Нэгэнт ял шийтгүүлсэн Чимгээ, Содномдаржаа, Амгаланбаатар гурвыг нэгнээ дарамталсан болгож жүжиглүүлсэн ч байж болно" гэсэн хардлага гарсан. Энэ бодитой юу?

-Юу гэж тийм зүйл байх вэ. Тухайн үед энэ хэргийг шалгаж байсан ажлын хэсэг өөрсдөдөө ашиглах зорилгоор Төв аймгийн хорихын зоорийн давхарт камер суурилуулсан. Харин хамт хорьдог нь бусад хүнтэй холих шаардлагагүй гэж үзсэнийх юм билээ.

С.ЗОРИГ АГСНЫ ГЭРГИЙ Б.БУЛГАНД ХОЛБОГДОХ ХЭРЭГ ХЭРЭГСЭХГҮЙ БОЛСОН

- С.Зориг агсны гэргий Б.Булганыг хэрэг гарсан өдрөөс хойш хуулийн байгууллага хараанаасаа салгаагүй. Энэ хүн өнөөдөр ямар статусаар шалгагдаж байгаа вэ?

- Хэрэг гардаг өдрөөс хойш Б.Булганыг хохирогч, гэрч, яллагдагчаар шалгаж байсан. Хамгийн сүүлд энэ хэргийн захиалагчийг шалгаж байхад түүнийг хамсаатан байж болзошгүй гэж үзэж яллагдагчаар татсан. Гэвч хэргийн хөөн хэлэлцэх хугацаа дуусаад, хэрэгсэхгүй болсон. Өнөөдрийн байдлаар Б.Булган шалгагдаагүй. Гэрч биш, яллагдагч биш гэсэн үг

-Энэ аллагыг захиалсан гэх хэргийг шалгах ажил ямар шатанд яваа вэ. Хэдэн хүнийг шалгаж байгааг хэлэх боломжтой юу?

-Захиалсан, зуучилсан, хамжсан гэх үйлдэлд холбогдуулан 3-4 хүнийг шалгаж байгаа.

-Тэдний дунд улстөрч байгаа юу?

-Байгаа

-Амгаланбаатар, Содномдаржаа нарыг саатуулан шалгаж байхад өрөөнд нь орж ирээд Содномдаржааг дарамталсан Итгэл гэдэг хүн суллагдсан байгаа гэж Ц.Нямдорж сайд хэлсэн. Тэр хүнийг шалгаж байгаа юу?

-Эргээд шалгаж байгаа.

-Улсын ерөнхий прокурорын дэргэдэх Мөрдөн байцаах албыг дахин байгуулах хэрэгтэй юу?

-УИХ-ын гишүүн Х.Нямбаатар, Ж.Батзандан нарын санаачилж энэ байгууллагыг сэргээх асуудлыг хөндсөн. Авлигатай тэмцэх газар, тагнуул, цагдаагийн байгууллагын төлөөлөлтэй уулзсан.