МАН-ЫН ТОМЧУУД ЭХНЭЭСЭЭ ПРОКУРОРЫН ХААЛГА ТАТАЖ ЭХЭЛЛЭЭ

МАН-ын томчууд эхнээсээ прокурорын хаалга татаж эхэлжээ. Тодруулбал, Эрүүл мэндийн яамны Төрийн нарийн бичгийн дарга асан Д.Очирбатад холбогдох хэргийг шүүхэд шилжүүлэх саналтай прокурорт илгээсэн гэж АТГ-аас мэдээллээ. Одоогоос жил гаруйн өмнө түүнийг тендер будлиантуулж, авилга авсан талаар олон нийт цуурч, хэвлэл мэдээллийн хэрэгслээр ярьж, бичиж эхэлсэн байдаг. Тэгвэл энэ үндэслэлтэй болох нь мөрдөн байцаалтын явцад тогтоогдож, өнөөдөр шүүхэд очих дээрээ тулаад байгаа ажээ.

Д.Очирбат гэж хэн бэ?

Түүнийг МАН-ыг унаж босоход хамт байж, ачааны хүндийг үүрч явсан цөөхөн гишүүний нэг гэж намын нөхөд нь ярьдаг. Харин олон нийт түүнийг Чингэлтэй дүүргийн Засаг дарга, УИХ-ын гишүүн байснаар нь мэднэ. Уламжлалт анагаах ухааны эмч мэргэжилтэй Д.Очирбат 2016 онд "мэргэжлийн" Засгийн газрын эд эс болж, ЭМЯ-ны Төрийн нарийн бичгийн даргаар томилогдсон байдаг. Гэхдээ түүнийг мэргэжлээрээ нэг ч жил ажиллаагүй гэдэг "хоч" мөн дагасаар ирсэн билээ. Бусдаар бол саяхныг хүртэл харьцангуй нэр цэвэр, ирээдүйтэй гишүүдийн нэг байсан.

Д.Очирбатад холбогдох хэргүүд

Гэвч жил гаруйхан хугацаанд Эрүүл мэндийн яамны Төрийн нарийн бичгийн даргын албыг хашихдаа тэрбээр "тэвчээр алдаж" нэлээд "бантан" хутгаж орхисон бололтой. Ямар сайндаа түүнийг салбарын сайдынх нь хүсэлтээр ажлаас нь чөлөөлөх вэ дээ. Улмаар Д.Очирбатыг 2017 оны нэгдүгээр сараас Улсын нэгдсэн төв эмнэлгийн даргын албанд томилсон ч энэ албыг хэдхэн сар хашаад улстөрийн "карьераа" өндөрлүүлсэн түүхтэй юм. Тухайн үед Д.Очирбатыг яамны аппаратад авилгын сүлжээ зохион байгуулсан, сайдын тушаалын хавсралт өөрчилж олон тендер будлиантуулсан, төсвийн хөрөнгө оруулалтын мөнгийг сайддаа мэдэгдэлгүй зүй бусаар зарцуулахыг завдсан хэрэгт холбож байсан.

Нарийн яривал, сайд нарын хоёрдугаар эмнэлгийн хашаанд барьж буй Үндэсний Оношлогоо Эмчилгээний Төвийн барилгын туслан гүйцэтгэгчийг шалгаруулах 20 тэрбум төгрөгийн тендерийн ялагчийг шалгаруулах ажлыг будлиулсан. Хууль бусаар шалгарсан "Жу Жу" ХХК-иас 400 сая төгрөгийн хахууль авч 2,4 тэрбум төгрөг шилжүүлсэн, есдүгээр сард шилжүүлсэн уг мөнгөнийхээ гүйцэтгэлийг хуурамчаар бүрдүүлсэн. Энэ тендерийг зарлахаас өмнө хууль бусаар гэрээ хийж уг ажлыг гүйцэтгүүлж байсан "Одкон" ХХК-д оны өмнө их хэмжээний мөнгө шилжүүлэхийг завдсан нь илэрсэн юм байна. Түүний байгуулсан хууль бус гэрээг хууль хяналтын байгууллага, Сангийн яамнаас шалган тогтоож санхүүжилтийг нь зогсоогоод байсан ажээ.

Мөн Сонгинохайрхан дүүрэгт Азийн хөгжлийн банкны санхүүжилтээр эмнэлэг барих ажлын үнэлгээний хороог байгуулах тушаалыг дур мэдэн нууцаар бэлтгэж, сайдын тамгыг сайддаа мэдэгдэлгүй даруулж, батлуулсан хэрэг нь илэрсэн гэдэг. Уг эмнэлгийн өртөг 80 тэрбум төгрөг байсныг албан бус эх сурвалж мэдээлж байгаа юм.

Энэ мэтээр түүнд холбогдох цуу яриа, аман мэдээлэлд АТГ-ын Мөрдөн шалгах алба цэг тавьж, "Албан үүрэг, бүрэн эрх, албан тушаалын байдлаа урвуулан ашиглаж өөртөө давуу байдал бий болгон улсад хохирол учруулсан" гэж мэдээлээд байна. Цаашид түүнд холбогдох хэрэг хэрхэн шийдэгдэхийг цаг хугацаа харуулах биз ээ.

ЭХ СУРВАЛЖ: Aрдчилал таймс сонин