ЕРӨНХИЙЛӨГЧӨӨС ДЭМЖЛЭГТЭЙ А.ЦЭРЭНСОДНОМ ЭРҮҮГИЙН ХЭРЭГТ ШАЛГАГДАЖ БАЙНА

1993 оноос хойш прокурорын анхан шатны байгууллагаас эхэлж ажилласан Александрын Цэрэнсодномыг Монгол Улсын Ерөнхийлөгч УЕП-ын орлогчийн албан тушаалруу зүтгүүлсэн юм. Өчигдөр УИХ дахь МАН-ын бүлэг тус асуудлыг хэлэлцээд А.Цэрэнсодномыг судлах зорилготой буцаажээ. УЕП-ын орлогчид горилогч А.Цэрэнсодном нь сонирхолтой намтар, түүхтэй нэгэн ажээ. Түүнд прокурорт ажиллаж үзээгүй газар гэж бараг байхгүй гэдэг нь түүний намтраас харагдана. Тэрээр 2003-2005 онд "Тээврийн прокурорын газар" орлогчоор ажиллаж байхдаа зам тээврийн ослын хэргийн шинжээчийн дүгнэлтийг мөрдөн байцаагчтайгаа нийлж будлиан хутгаж, хуурамчаар үйлдсэн хэрэгт унаж байжээ. А.Цэрэнсодном ажлаасаа халагдаж, мөрдөн байцаагч нь ял авсан байдаг. Прокуророос авилгын асуудлаар ажлаасаа халагдсан А.Цэрэнсодном шууд МХЕГ-т байцаагчаар ажилд ороод тэндээсээ "Ашигт малтмал, газрын тосны хэрэг эрхлэх газар" Хуулийн хэлтсийн даргаар ажилласан юм билээ. Тус газрын дарга Д.Батхуяг ял авсан дуулиантай жилүүдэд тэнд ажиллаж байгаад "Эрдэнэт" үйлдвэрийн хуулийн хэлтсийн даргаар томилогджээ. Тус үйлдвэрийг барьцаанд тавьсан асуудлаар шалгагдаад буй Б.Мөнхжаргалын оронд томилогдсон гэсэн үг. А.Цэрэнсодном 2016 прокурор хаалгыг дахин татаж орсон байдаг. Хамгийн сүүлд Сүхбаатар дүүргийн прокурорын газарт хэрэг бүртгэх, мөрдөн байцаах ажиллагаанд хяналт тавих ажил хариуцсан ахлах прокуророор ажиллаж байна. 26 жилийн турш 12 ажлын байр сэлгэж албан тушаалд өгсөн уруудаж явахдаа А.Цэрэнсодном хоёр удаа алдаа гаргаж авилгын хэрэгт холбогдсон байдаг. Нэгийг нь дээр дурдсан, харин хоёрдох нь одоо эрүүгийн хэрэг үүсгэгдэн шалгагдаж байгаа. Бусдаас их хэмжээний мөнгө авч гадаадад сургуульд сурсан, бусдыг дарамталж авилга авсан гэдэг өргөдлийн дагуу тэрээр АТГ-т шалгагдаж байгаа юм байна. Тодруулбал А.Цэрэнсодном нь НПГ-т ажиллаж байхдаа иргэн Н-ээс бусдаар дамжуулан 154 сая төгрөгийн хахууль авсан байж болзошгүй асуудлаар хэрэг бүртгэл нээжээ. Дээр нь Монгол Улсын Үндсэн хуулинд УЕП-ын орлогчийг УЕП-ын саналыг үндэслэн томилох ёстой гэж заасан байдаг. Гэтэл Монгол Улсын Ерөнхийлөгч Х.Баттулга УЕПГ-ын дарга М.Энх-Амгалангийн саналыг сонсолгүй шууд УИХ-ын даргаруу ханджээ. Энэ нь үндсэн хуулийн зөрчил үүсэхээр байгааг эрх баригчид олж харсан бололтой юм.